Ant berý rásimine ýnıversıtet basshylyǵy, Áskerı is ınstıtýtynyń ofıserleri, áskerı ardagerler, stýdentterdiń týystary qatysty. Qazaqstan Respýblıkasynyń memlekettik týyn ofıserlik shen alǵan 3-kýrs stýdenti Almasbek Ábdejamı kóterdi. Ol elimizdiń batysynda sý tasqyny zardaptaryn joıýǵa qatysqany úshin Sátbaev ýnıversıtetiniń altyn medalimen marapattaldy. Sondaı-aq Sátbaev shyńyna shyǵýǵa qatysqan stýdentter de ýnıversıtet basshylyǵy atynan marapatqa ıe boldy.
«Men Sátbaev ýnıversıtetiniń 90 jyldyǵy jáne Qanysh Imantaıuly Sátbaevtyń 125 jyldyǵy toılanatyn mereıli jyly Sátbaev shyńyna shyǵý ekspedısııasynyń qatysý baqytyna ıe boldym. 20 maýsym kúni 4 myń metrden astam bıiktikte bolashaq stýdentterge 10 jyldan keıin bizdiń órleýimizdi qaıtalap, aty ańyzǵa aınalǵan Polıteh túlekteriniń dástúrleri men dańqty isterin jalǵastyrýlary úshin joldaý qaldyrdyq», dedi Áskerı is ınstıtýtynyń túlegi Snejana Kolesnıkova.
Áskerı is ınstıtýtynyń oqý baǵdarlamasy teorııalyq sabaqtardy ǵana emes jan-jaqty praktıkalyq daıyndyqty da qamtıdy. Eki jyl oqý barysynda stýdentter ekinshi mamandyqty meńgerip, zapastaǵy leıtenant áskerı ataǵyn alyp shyǵady. Sonymen birge basshylyq etý qabiletin úırenip, kóshbasshylyq qasıetterin shyńdaıdy.
«Búgin sizder Otanǵa adal qyzmet etýge ant berdińizder, sondyqtan osy áskerı antqa adal bolyp, ony abyroımen alyp júrińizder», dedi Sátbaev ýnıversıtetiniń rektory Meıram Begentaev.
Aıta keteıik, Sátbaev ýnıversıtettiń Áskerı is ınstıtýtynyń tarıhy 1940 jyldan, ıaǵnı Qazaq taý-ken metallýrgııa ınstıtýtynda Áskerı kafedra ashylǵan kezeńnen bastalady. Surapyl soǵys jyldarynda ýnıversıtettiń alty ókili Keńes Odaǵynyń Batyry ataǵyna ıe boldy. Soǵystan keıingi jyldary munda eki ret Keńes Odaǵynyń Batyry Talǵat Begeldınov bilim alyp, keıin ol Qazaq ulttyq tehnıkalyq zertteý ýnıversıtetiniń Qurmetti professory atandy.
