Foto: Sý resýrstary jáne ırrıgasııa mınıstrligi
Mınıstr eń aldymen Qytaı azamattyq ınjenerlik-qurylys korporasııasynyń vıse-prezıdenti Szıan Igaomen kezdesti. Kompanııa Qazaqstanda 2017 jyldan beri jumys isteıdi. Qazirgi ýaqytta QAIQK Jambyl oblysyndaǵy ırrıgasııalyq arnalardy, drenaj júıeleri men qurylystardy rekonstrýksııalaýdy qosa alǵanda, aýqymdy 5 jobany iske asyryp jatyr.
Taraptar sýarý júıelerin sıfrlandyrý jáne osy baǵyttaǵy ekijaqty yntymaqtastyqty talqylady. QAIQK ókilderi Qazaqstannyń sý salasyn sıfrlandyrý jáne avtomattandyrý boıynsha jańa jobalarǵa qyzyǵýshylyq tanytty.
«Sıfrlyq tehnologııalar daqyl túrlerine, klımatqa jáne aýmaqqa baılanysty sýdy dál jáne ýaqtyly bólýdi qamtamasyz ete otyryp, sý resýrstaryn basqarýdyń tıimdiligin aıtarlyqtaı arttyrýǵa múmkindik beredi. Birlesken kúsh-jiger, resýrstar men tájirıbeni paıdalana otyryp aldymyzda turǵan maqsattarǵa qol jetkize alatynymyzǵa senimdimin», dedi Nurjan Nurjigitov.
Sondaı-aq mınıstr CITIC Gonstruction kompanııasynyń prezıdenti Szıansıan Iаnmen kezdesip, sý únemdeý tehnologııalaryn engizý máselesin pysyqtady. Qytaılyq kásipkerler Qazaqstanda sý únemdeý júıelerin shyǵarýǵa daıyn ekendikterin bildirdi.
Nurjan Nurjigitov óz kezeginde jańa sý qoımalaryn salý jáne qoldanystaǵy sý qoımalaryn rekonstrýksııalaý, sondaı-aq Almaty men Jetisý oblystaryndaǵy sýarý júıelerin jańǵyrtý jónindegi mınıstrliktiń josparlary týraly aıtyp berdi.
Sý resýrstary jáne ırrıgasııa mınıstri Power China kompanııasynyń prezıdenti Tan Sıaofenmen kezdesti. Mınıstrlik pen Power China Qazaqstannyń sý sharýashylyǵy mamandaryn Qytaıda biliktilik arttyrý kýrstarynan ótedi dep kelisti.
Sonymen qatar Nurjan Nurjigitov qytaılyq kompanııaǵa «Qazsýshar» kásipornymen yntymaqtastyq týraly Memorandýmǵa qol qoıýdy usyndy. Power China basshylyǵy bolsa jańa sý qoımalarynyń qurylysyna qatysýǵa nıet bildirdi. Bul máseleni egjeı-tegjeıli talqylaý aldaǵy ýaqytta jumys toby deńgeıinde jalǵasady.
«Power China Qazaqstanda burynnan tabysty jumys istep keledi. Kompanııa bizdiń elimizde birneshe aýqymdy jobany júzege asyrdy, sondyqtan biz ózara tıimdi yntymaqtastyqqa nıettimiz. Bul bizdiń birlesken jobalarymyzdy ǵylymı súıemeldeýdi tıimdirek etedi», dedi N.Nurjigitov.
Mınıstrdiń China Energy International Group kompanııasynyń basqarma tóraǵasy Lıý Szesıanmen kezdesýinde Qazaqstannyń sý qoımalarynda sý elektr stansııalarynyń qurylysy talqylandy. Qytaılyq kásipkerler atalǵan jobaǵa qyzyǵýshylyq tanytty. Taraptar bul máseleni tolyǵyraq talqylaýǵa kelisti.
China Energy International Group ókilderi Qazaqstannyń sý salasyn sıfrlandyrý jáne avtomattandyrý jobalaryna qatysýǵa nıet bildirdi. Sonymen qatar qytaılyq kompanııa elimizde aǵyndy sýlardy tazartý qondyrǵylaryn ornatýǵa daıyn ekenin jetkizdi.
