Foto: Aqorda
Qasym-Jomart Toqaev Ortalyq Azııa elderine tán beıbitshilikti saqtaý umtylysy men qurlyqta órkenıetaralyq dıalog ornatýy halyqtardyń ǵasyrlar boıǵy úlesi ekenin atap ótti. Sondaı-aq Ortalyq Azııa memleketteriniń jahandyq mańyzdy Birikken Ulttar Uıymy Bas Assambleıasynyń mańyzdy qararlarynyń teń avtorlary atanýy da, aımaqtaǵy ilgerileýdiń jarqyn mysaly ekenin aıǵaqtady. Prezıdent maqalasynda Ortalyq Azııa saıası tutastyq pen yntymaqty bekemdeý baǵytynda jańa format taýyp, dıalog alańyna aınalǵanyna basa nazar aýdarǵan.
«OA plıýs» formatyndaǵy jańa dıalog oryndarynyń paıda bolýy Ortalyq Azııanyń halyqaralyq saıasat sýbektisi retindegi saıası salmaǵy arta túskenin ańǵartady. Osyǵan deıin mundaı formatta 9 sammıt jáne joǵary deńgeıdegi kezdesý ótti. Keıingi eki jylda «OA – RF» (Astana), «OA – QHR» (Sıan), «OA – AQSh» (Nıý-Iork), «OA – GFR» (Berlın) birinshi sammıtteri, OA jáne Eýropalyq Odaq memleketteri basshylarynyń eki kezdesýi (Astana, Sholpan-Ata), «OA – PShAMYK» (Jıdda) birinshi sammıti, sondaı-aq «OA – Úndistan» sammıti (onlaın formatta) ótkizildi. Bıyl Astanada alǵash ret «OA – Japonııa» sammıti ótedi. Osy formattaǵy ózara yqpaldastyqqa basqa da elder, halyqaralyq uıymdar qyzyǵýshylyq tanytyp otyrǵanyn atap ótken jón. Osylaısha, óńirdiń álemdik arena sýbektisi retindegi ornyn bekitýge mańyzdy qadam jasalyp jatyr», dep jazdy Qasym-Jomart Toqaev.
Memlekt basshysy Ortalyq Azııa elderiniń san saladaǵy tolaıym tabystaryn dástúrli qundylyqtardy ustaný jolymen baılanystyrǵan. Qasym-Jomart Toqaev Ortalyq Azııa elderiniń geografııalyq, ekonomıkalyq, zııatkerlik múmkindikteri jańa belesterdi baǵyndyrýǵa qaýqarly ekenin erekshe atap ótken.
«О́ńirdiń ekonomıkalyq salmaǵynyń arta túsýi, ınnovasııalar úshin ashyq bolýy jáne zııatkerlik áleýeti onyń qazirgi zamanǵy álemdik qurylymnyń negizgi qozǵaýshy kúshteriniń birine aınalýyna múmkindik beretin alǵysharttardy qalyptastyrady. Bizdiń memleketterimizdiń buǵan qajetti barlyq resýrsy men múmkindigi bar. Syrtqy áriptesterimizben birlesip júrgizetin óńirlik jobalar aıasyndaǵy ortaq ustanymdarymyzdy dıalog alańdarynda jan-jaqty ilgeriletý úshin kúsh biriktirý máselesi erekshe nazar aýdarýǵa laıyq. Ortalyq Azııany Eýropa men Azııanyń arasyndaǵy kópir retinde ǵana emes, halyqaralyq qatynastar salasynda jahandyq deńgeıdegi jańa ortalyqqa aınalýǵa qabiletti jeke oıynshy retinde tanytatyn ýaqyt kelgenine senimdimin», dep jazdy Prezıdent.
Memleket basshysynyń «Egemen Qazaqstan» gazetiniń búgingi sanynda jarııalanǵan maqalasynyń tolyq nusqasyn myna jerden oqı alasyzdar.
