Nysan osy jyldyń jeltoqsanynda tolyǵymen aıaqtalady. Alaıda mamandardyń aıtýynsha, kólikterge qazan aıynan bastap júrýge ruqsat berilmek. Kópir qurylysy bastalǵanda-aq shyǵys jurty malaqaılaryn aspanǵa atyp qýanǵan. Ásirese aralda qalyp qoıǵandaı kúı keship kelgen Marqakól, Kúrshim aýdandary halqynyń qýanyshy alabóten. Ala jazdaı sý betinde qalyqtap parommen qatynasatyn. Qystyń kúni jandaryn shúberekke túıip, muzben júretin. Mezgildiń ólara shaqtarynda Altaı aýdanyn aınalyp, oblys ortalyǵyna jeter edi. Qysqasy, joldyń mashaqatyn elý jyldan astam ýaqyt kórip kelgen. Endi elimizdegi eń uzyn ótkel – Buqtyrma kópirimen qatynaıtyn kún de alys emes. Uzyndyǵy 1 316 metr bolatyn kópir Kúrshim men Samar aýdandaryn baılanystyryp tur.
2019 jyldyń 19 qyrkúıeginde Prezıdent Buqtyrma sý qoımasynan ótetin kópir salý úshin qarajat bólýdi tapsyrǵan. Kóp uzamaı tıisti qarjy bólinip, 2021 jyldyń aqpanynda nysan qurylysy bastaldy.
Qurylys jumystary bastalǵan soń 2022-2023 jyldary qurylys materıaldary men janar-jaǵarmaı baǵasy qymbattap, mańyzdy jobaǵa túzetý engizilgen bolatyn. Sóıtip, onyń quny eki ese ósti.Eki jolaqty kópirdiń eni – 12,2 metr, al bıiktigi – 18 metr. Táýligine 80 myń kólikke deıin ótedi. Kópirdiń strategııalyq mańyzy zor. Ol aımaqtyń áleýmettik-ekonomıkalyq damýyna yqpal etedi.
Kópir qurylysy Kúrshim jáne qaıtadan qurylǵan Marqakól aýdandarynyń ekonomıkasyna barynsha oń áserin tıgizbek. Aıta keteıik, kópirdi salý jumystaryn tolyǵymen otandyq merdiger júzege asyryp jatyr. Qurylysqa elimizdiń birqatar óńirinen ınjenerler tartylǵan. Al negizgi jumystar jergilikti mamandarǵa júktelgen.
«QazAvtoJol» mekemesi oblystyq fılıaly dırektorynyń orynbasary Almas Qasenovtiń aıtýynsha, aralyq qurylystardy montajdaý jumystary tolyǵymen aıaqtaldy. 21 tirek ornatyldy, onyń ishinde 20-sy – negizgi tirek. 512 metrge deıin eki qabat asfalt tóselgen. Endi nysannyń qalǵan bóligin armatýralaý jáne betondaý jumystaryna kezek keldi.
– Kópirge kireberis joldar da salynyp jatyr. Samar aýdanynda kópirge deıingi jol ýchaskesiniń uzyndyǵy 17 shaqyrym 200 metr bolady, onyń 10 shaqyrymyna asfalttyń birinshi qabaty tóselgen. Kúrshim aýdanyndaǵy ýchaskeniń uzyndyǵy – 1 shaqyrym 300 metr, – deıdi dırektordyń orynbasary Almas Qasenov.
Jýyrda strategııalyq mańyzǵa ıe nysandy Premer-mınıstr Oljas Bektenov te tekserip ketti.
– Qazir kópirdegi kólik qozǵalysyn iske qosý úshin jumystardy tezirek aıaqtap, buǵan barlyq kúshti jumyldyrý kerek. Kólik-logıstıka salasy elimizdiń ekonomıkalyq damýynyń qozǵaýshy kúshteriniń birine aınalýǵa tıis. Sondyqtan biz osyndaı ınfraqurylymdyq jobalardy jedel iske asyrýymyz kerek, – dedi Oljas Bektenov.
Qos jaǵalaýdan bastalǵan qurylystyń qarqyny joǵary. Osylaısha, Prezıdenttiń tapsyrmasymen bastalǵan iri joba aıaqtalýǵa jaqyn. Qurylys bıyl jeltoqsanda halyqqa tolyǵymen qoldanysqa beriledi.
Shyǵys Qazaqstan oblysy
