Antıfrod ortalyǵynyń ıgiligi

Tań azanmen belgili jýrnalıst Qaınar Oljaı aǵamyzdyń jazǵanyn oqyp, tańyrqap otyrmyz. Ol kisige tanymal sýretshi Januzaq Músápir WhatsApp arqyly habarlama joldap, qaryz suraıdy.

«Oıymyzda dáneme joq, joldastyń vatsabyna «Kimge aýdarý kerek, Jaqa?» dep jaz­dyq. Bir mınýt ótpeı jaýap keldi. Kártishke nómirdi kór­setipti. Ony smartfonnan qa­ǵazǵa muqııattap jazyp aldyq. О́ıtkeni sansyz oı quıylyp turatyn myna basqa sıfr turmaıtyn jyny bar. 4400 4302 2130 3933. Qaǵazǵa jazyp alyp, ústinen bir tekserdik. Sodan keıin Kaspı qosymshasyn ashyp, aqsha aýdarý úshin osy kár­tishke nómirin terdik. «Tólegen D» dep tur eken. Anyq­­tap alý úshin Jaqańa habar joldadyq. «Iá» dep jaýap ber­di ol kisi», deıdi.

Sóıtedi de, aǵamyz Jaqań­nyń kórsetken kisisine álgi 250 000 teńgeni aýdarady. Biraq qyzyq bolǵanda, bank bul aýdarymdy ótkizbeıdi. Karta nómirin taǵy bir márte tekserip, ekinshi ret aýdarýǵa talpynady. Bul joly da júzege aspaı qalady. Keıin baryp telefon shalyp mán-jaıdy bilgen kezde, «Qaıneke, bular alaıaq­tar. Meniń atymdy paıdalanyp ja­tyr, aýdara kórmeńiz» deıdi sýret­shi aǵamyz shyr-pyr bolyp.

Qarapaıym halyq úshin 250 myń teńge az soma emes. Qanshama jannyń bir aılyq eńbekaqysy. Ol turmaq abaısyzda 5 myń teńgeńizdi joǵaltyp alsańyz da, jarty kún janyń syzdap júredi...

Aıtaıyq degenimiz, alaıaqtar­ǵa qoıylatyn tosqaýyldyń soń­ǵy kezde nyǵaıyp jatqany. Áıtpese, Qaınar aǵamyzdyń ádepki aýdarymy-aq kedergisiz bázbireýdiń shotyna top ete qalǵaly tur edi. Muny Ulttyq bank birneshe kún buryn ǵana iske qosqan «Alaıaqtyqqa tán tranzaksııalar boıynsha derek almasý ortalyǵynyń» – Antıfrod ortalyǵynyń ıgi­ligi dese bol­ǵan­daı.) Joba qu­­qyq qorǵaý organdarymen jáne qarjy naryǵyna qatysý­shy­larmen birlesip iske asyrylyp otyr.

Ulttyq bank taratqan máli­metke súıensek, Antıfrod or­talyǵy alaıaqtyq belgisi bar operasııalarǵa qarsy áreket etý úshin qurylǵan.

«Qarjy uıymdaryna alaıaq­­­tyqqa tán operasııalar­dy­ anyq­taýǵa jáne buǵattaýǵa, alaıaqtyq belgisi bar operasııa­lar­ǵa jedel áreket etýge, onyń qa­­tysýshylary arasynda naq­ty­ ýaqyt rejiminde aqparat al­masýǵa da múmkindik beredi. Antı­frod ortalyǵynyń ju­mysy alaıaq­tyq operasııalar boıyn­sha biryńǵaı derekter bazasyn júrgizýdi de kózdeıdi. Plat­forma iske qosylǵan sátten bas­tap qarjy uıymdary men qu­qyq qorǵaý organdary alaıaqtyq operasııalar boıynsha 400-ge jýyq faktini anyqtady jáne alaıaqtyq árekettermen baılanysty 30 mıllıon teńgege jýyq qarajatty buǵattady», delingen habarlamada.

Aldaǵy ýaqytta kúdikti tran­­zaksııalardy anyqtaý tıim­diligin arttyrý úshin jasandy ıntellekt tehnologııalaryn qoldaný da josparda bar eken. Bul jerde eskere ketetin bir jaıt bar – áldebir pysyqaı-alaıaqtar (alaıaqtar jýas bolýshy ma edi ózi) «Biz Antıfrod ortalyǵynan habarlasyp tur­myz, sizdiń shotyńyzda kúmán­di aýdarym júrip jatyr» dep habarlasyp, qaltańyzdy qaǵyp-silkip ketýi de bek múmkin ǵoı. Sondyqtan bile júrgenińiz abzal – Antıfrod ortalyǵynyń qyzmetkerleri men ókilderi aqparat jınaý nemese qandaı da bir operasııa júrgizý maqsa­tynda eshýaqytta jeke tulǵaǵa qońyraý shalmaıdy.

Ortalyq qyzmetkerleri tek qarjy, tólem uıymdarymen, quqyq qorǵaý organdarymen jáne uıaly baılanys operatorlarymen jumys isteıdi. Osyǵan baılanysty Ulttyq bank azamattardy qyraǵy bolýǵa jáne Antıfrod ortalyǵy atynan dep qońyraý shalýy múmkin alaıaqtardyń áreketin elemeýge shaqyrady.