Foto: gov.kz
Kelissózder barysynda taraptar Qazaqstandy Ońtústik Koreıadaǵy eńbekke ruqsat berý júıesine – Employment Permit System (budan ári – EPS) engizý máselelerin talqylady.
«Almaty qalasynda Koreıa Respýblıkasynda jumys istegisi keletin QR-nyń azamattaryn kásiptik jáne tildik daıarlaý boıynsha kópsalaly ortalyq qurylyp jatyr», dedi Asqarbek Ertaev.
Sondaı-aq ol tehnıkalyq mamandyqtar boıynsha testileý, medısınalyq tekserý, biliktilikti arttyrý boıynsha oqytýǵa daıyn birqatar áleýmettik jáne óndiristik obektiler anyqtalǵanyn habarlady.
«QR Ishki ister mınıstrligimen birlesip zańsyz kóshi-qonnyń jolyn kesýge jáne zańdy eńbek qyzmetin keńeıtý úshin jaǵdaı jasaýǵa baǵyttalǵan sharalardy kúsheıtý máseleleri pysyqtalyp jatyr», dep tolyqtyrdy vıse-mınıstr.
Kelissózder qorytyndysy boıynsha Koreıa Respýblıkasy Jumyspen qamtý jáne eńbek mınıstrliginiń ókilderi Qazaqstandy EPS júıesine qosý týraly nıetin taǵy da rastady, bul Qazaqstan azamattaryna jasalǵan eńbek sharttary sheńberinde Ońtústik Koreıada zańdy túrde jumys isteýge múmkindik beredi.
Kezdesý sońynda taraptar eki el arasyndaǵy eńbek kóshi-qony salasyndaǵy yntymaqtastyqty tereńdetýdiń mańyzdylyǵyn atap ótti, bul – shetelde jumysqa ornalasýǵa umtylatyn Qazaqstan azamattary úshin jaǵdaıdy jaqsartýǵa, sondaı-aq olardyń kásibı daıarlyq deńgeıin arttyrýǵa múmkindik beredi.
