Nurlan Ábdirov Belarýs Respýblıkasy OSK tóraǵasy Igor Karpenkomen, Amerıka Qurama Shtattaryndaǵy Saılaýǵa járdemdesý jónindegi komıssııanyń vıse-tóraǵasy Donald Palmermen, Túrki memleketteri uıymy (TMU) bas hatshysynyń orynbasary Sadı Djafarov bastaǵan TMU baıqaýshylar mıssııasynyń delegasııasymen, Túrkııanyń Joǵary saılaý keńesiniń músheleri Chopýr Alı jáne Úrker Alımen kezdesýler ótkizdi. Sondaı-aq Moldova Ortalyq saılaý komıssııasynyń múshesi Mırcheı Katyreýmen de kezdesý ótti.
I.Karpenkomen kezdesýde ORK basshysy TMD-ǵa qatysýshy elderdiń Ortalyq saılaý organdary basshylarynyń konsýltatıvtik keńesine tóraǵalyq etý sheńberinde Belarýs OSK-men ózara is-qımyl týraly sóz qozǵady.
D.Palmermen sóılese otyryp, N.Ábdirov Qazaqstandaǵy saılaý úderisterin alǵash ret AQSh-taǵy Saılaýǵa járdemdesý jónindegi komıssııanyń ókili baıqap otyrǵanyn atap ótti.
«Qazaqstandaǵy demokratııalyq reformalar týraly tolyq aqparat alǵanyma rızamyn. AQSh úshin daýys berýdiń ashyq ári anyq bolýy mańyzdy. Qazaqstanǵa alǵash ret kelip otyrmyn ári bul – men úshin referendýmǵa qatysa otyryp, Qazaqstannyń saılaýy men referendýmy boıynsha júıeni jaqsyraq zerdeleýge úlken múmkindik. Referendýmǵa daıyndyq birneshe aıǵa sozyldy, kóp jumys atqaryldy. Elderimizdiń saılaý organdary arasynda tájirıbe almasýdy jalǵastyrý úshin biz Qazaqstannyń OSK ókilderin 2024 jylǵy 5 qarashada AQSh-taǵy prezıdenttik saılaýdy baıqaýǵa shaqyrdyq», dedi D.Palmer.
Onyń aıtýynsha, AQSh-taǵy mańyzdy máselelerdiń biri – múgedektigi bar adamdardyń saılaý quqyǵyn qamtamasyz etý. Ol Qazaqstanda da bul máselelerge úlken mán beriletini týraly habardar bolǵanyn aıtty.
TMU-men yntymaqtastyq Qazaqstan Prezıdenti Qasym-Jomart Toqaevtyń TMU-na múshe memleketterdiń Ortalyq saılaý organdarynyń konsýltatıvtik keńesin qurý týraly bastamasyn iske asyrý aıasynda, sondaı-aq Túrkııa jáne Moldovamen ekijaqty memorandýmdardy iske asyrý sheńberinde de júzege asyrylady.
Kezdesýlerde N.Ábdirov qonaqtardy 6 qazanǵa belgilengen respýblıkalyq referendýmǵa daıyndyq pen ony ótkizý barysynan habardar etti, plebıssıtti ótkizýge qatysty kezdesýlerge qatysýshylardyń naýqannyń negizgi kezeńderi men onyń qorytyndylaryn shyǵarý jónindegi suraqtaryna jaýap berdi.
Kezdesý barysynda ORK tóraǵasy elimizde halyqaralyq baıqaýshylardyń saılaý naýqandaryna qatysýyna, onyń ishinde elimizdiń demokratııalyq damýyn qoldaýdyń aıǵaǵy retinde basa mán beriletinin atap ótti.
Kezdesýlerge qatysýshylar naýqandy uıymdastyrýshylardyń joǵary kásibı daıyndyq deńgeıin atap ótip, daýys berý kúni obektıvti ári beıtarap túrde baıqaýdy júzege asyrýǵa daıyn ekenin bildirdi.
