Foto: Halyq úni
Vedomstvo málimetinshe, qyrkúıek aıynda Enbek.kz elektrondyq eńbek bırjasynda 136,6 myń bos jumys orny ornalastyrylǵan, bul kórsetkish tamyz aıymen salystyrǵanda 4% - ǵa (4,9 myń) artyq. Bul rette jumys izdeýshilerdiń belsendiligi tómendeý úrdisin saqtap qalǵan, ıaǵnı 122,5 myń túıindeme jarııalanǵan, bul tamyzǵa qaraǵanda 5% - ǵa (6,4 myń) az ekenin belgili boldy.
Aıta keteıik, kadrlarǵa suranystyń aıtarlyqtaı ósýi kúzgi-qysqy jylytý maýsymy men ónerkásip, qurylys jáne kólik jumysshylary aldyndaǵy jumys kóleminiń ulǵaıýyna baılanysty.
Sonymen qatar bilim berý salasy eń suranysqa ıe sala bolyp qala beredi, sebebi ornalastyrylǵan bos jumys oryndarynyń úshten birinen astamyn da osy sala (53,2 myń) quraǵan.
Bilim berý salasynda tárbıeshiler (2,7 myń bos jumys orny), matematıka muǵalimderi (2,1 myń) jáne bastaýysh synyp muǵalimderi (2,1 myń bos jumys orny) úlken suranysqa ıe bolǵan. Al, densaýlyq saqtaý salasynda sanıtarlar (1,3 myń bos jumys orny), medbıkeler (1,3 myń) jáne jalpy praktıka dárigerleri (604 bos jumys orny) asa suranysqa ıe.
«Qyrkúıek aıynda jumys berýshiler kelesi mamandarǵa eń joǵary jalaqyny usyndy: bas qurylysshylarǵa – aıyna 716 myń teńgeden, avıasııa salasyndaǵy ınjenerlerge – 565 myń teńgeden jáne taý-ken ónerkásibindegi qyzmet bastyqtaryna – 502 myń teńgeden», dep habarlady Eńbek jáne halyqty áleýmettik qorǵaý mınıstrligi.
Jumys izdeýshiler, óz kezeginde, kelesi pozısııalar úshin eń joǵary jalaqyny surady: óndirýshi ónerkásiptiń qurylymdyq bólimsheleriniń basshylary – 1,2 mln teńge, aqparat jáne baılanys salasyndaǵy basshylardyń orynbasarlary – 858 myń teńge, sondaı-aq kommersııalyq sektordaǵy marketıng qyzmetiniń basshylary – aıyna 847 myń teńge.
