Foto: ashyq derekkóz
Dárigerler naýqasqa «sozylmaly bronhıt pen pnevmonııa» dıagnozyn qoıyp, terapııa bólimine jatqyzǵan. Em nátıje bermeı, naýqastyń jaǵdaıy nasharlaǵan. Kompıýterlik tomografııa zeınetkerde «plevrıt» bolýy múmkin ekenin kórsetken. 4 aptadan keıin naýqastyń jaǵdaıy odan saıyn nasharlap, oblystyq aýrýhanaǵa jetkizilgen. 76 jastaǵy áıel adam sol jerde jan tapsyrǵan.
Qaıtys bolǵan áıeldiń uly Densaýlyq saqtaý basqarmasyna shaǵymdanyp, dárigerler salǵyrttyq tanytyp, tıisti emdeý sharalaryn júrgizbegenin jetkizgen. Tekserý barysynda aýrýhana tarapynan zań buzýshylyqtar anyqtalǵan.
Tekserý materıaldary Batys Qazaqstan oblystyq Polısııa departamentine joldanyp, qylmystyq is qozǵaldy, qylmystyq quqyq buzýshylyq quramynyń bolmaýyna baılanysty is birneshe ret toqtatylyp, prokýratýra kúshin joıǵan.
Densaýlyq saqtaý basqarmasy qalalyq aýrýhananyń qarsylyǵyn qabyldamaǵandyqtan, marqumnyń uly aýrýhanadan moraldyq shyǵyndy óteý týraly Oral qalasynyń №2 sotyna shaǵym túsirgen.
Ol anasynyń ólimine sapasyz medısınalyq kómek pen qalalyq aýrýhana dárigerleriniń áreketsizdigi sebep bolǵanyn atap ótken. Sondaı-aq talap qoıýshynyń anasy emdelip jatqan aýrýhananyń terapııa bóliminde jalpy praktıkalyq dárigerdiń kýáligi bar maman jumys istegeni, oǵan quqyǵy joq ekeni anyqtaldy.
Sarapshy naýqasqa onyń jasy men onda bar sozylmaly aýrýlary, sonyń ishinde, búırektiń jedel zaqymdanýyn týdyrǵan antıbıotıkter eskerilmeı, dári-dármek taǵaıyndalǵanyn anyqtady. Tıisti bakterııaǵa qarsy preparattar men gemodıalızdi engizý naýqastyń ómirin uzartýy múmkin edi.
Sot medısınalyq qujattardy, sarapshylyq qorytyndylardy jáne tekserý aktisin eskere otyryp, der kezinde qaıtalama synaqtar ótkizbeý, naýqastyń jaǵdaıyn durys baǵalamaý, emdeýdi kesh túzetý, nefrolog keńesiniń ýaqytynda bolmaýy men konsılıýmnyń kesh júrgizilýi aýrýdyń nátıjesine áser etkenin jáne ólimge ákelip soqqanyn anyqtady.
Joǵaryda aıtylǵandardyń negizinde talap qoıý ishinara qanaǵattandyryldy, talap qoıýshynyń paıdasyna aýrýhanadan 2 mln teńge moraldyq shyǵyn óndirildi.
Sheshim zańdy kúshine engen joq.
