«Armıandyq «Beıbitshilik tiregi»: Ońtústik Kavkazdyń ulttyq artyqshylyǵy jáne turaqty damýynyń kepili» taqyrybyndaǵy dárisin Armenııa basshysy óz tilinde oqydy. Ol ár ult ana tilinde sóıleýi mańyzdy ekenin aıtty.
– Resmı kezdesýlerde men de, Premer-mınıstrimiz de óz tilimizde sóıleımiz. Muny óte mańyzdy dep sanaımyn. Bul ózimizdi kórsetý úshin ǵana emes, shyn máninde, bizdiń táýelsiz, baqýatty memleket ekenimizdi taǵy bir márte dáleldeıdi, – dedi V.Hachatýrıan.
Armenııa prezıdentiniń aıtýynsha, óz elindegi jumyssyzdyq – 12 paıyz. Dese de memlekette jumys kúshi tapshylyǵy seziledi.
– Otandastarymyzǵa belgili bir salada jumys isteý tıimsiz bolyp kórinedi, sondyqtan olar jumys istegisi joq. Sol sebepti jumyssyzdar dep esepteledi. Degenmen bizdiń kóshi-qon saıasatymyz bar jáne sol arqyly Úndistannan, basqa da shet memleketterden jumys kúshin tartamyz. Negizi túrli baǵalaýǵa sáıkes, jumyssyzdyq deńgeıi 5 paıyzdan aspaýǵa tıis, – dedi ol.
Akademııada Armenııa Prezıdentine proktorıng elementteri bar Admission (qabyldaý komıssııasy) aqparattyq júıesi men iCademium (LMS) júıesi kórsetildi. Sondaı-aq Vaagn Hachatýrıan biliktilikti arttyrý kýrstary tyńdaýshylarynyń kommýnıkatıvtik daǵdylaryn arttyrý maqsatynda paıdalanylatyn medıa-stýdııanyń múmkindikterimen, úzdiksiz bilim berý platformasy jáne qashyqtan oqytý kýrstaryn jazýǵa arnalǵan JALINGA beınestýdııasymen tanysty.
Vaagn Hachatýrıan óz sózinde Qazaqstan men Armenııa arasyndaǵy Dostyq pen yntymaqtastyq týraly shartqa qol qoıylǵanyna 25 jyl tolǵanyn atap ótti. Sondaı-aq eki el arasyndaǵy dostyq qarym-qatynas uzaq jylǵa jalǵasatynyna senim bildirdi.
О́z kezeginde Memlekettik basqarý akademııasynyń rektory Erlan Ábil akademııanyń bilim alýshylary aqparatty birinshi basshydan alǵany mańyzdy ekenin jetkizdi.
Akademııanyń Dıplomatııa ınstıtýtynyń magıstranty kezdesýden alǵan áserimen bólisti.
– Armenııa Prezıdentimen kezdesý óte qyzyqty ári paıdaly boldy. Armenııa ekonomıkasynyń, kólik-logıstıka salasynyń, aýyl sharýashylyǵynyń damýy týraly biraz aqparat aldyq, makroekonomıkalyq kórsetkishterimen tanystyq. Bul – erekshe sıpatqa ıe kezdesý. Prezıdenttiń akademııaǵa kelip, bizge dáris oqýynyń ózi bilimge nazar aýdaratynyn bildiredi, – dedi Temirlan Saılaýuly.
Prezıdenttiń dárisine Armenııanyń resmı delegasııasy, onyń ishinde Armenııa Respýblıkasynyń Qazaqstandaǵy Tótenshe jáne ókiletti elshisi, Qazaqstannyń Armenııa Respýblıkasyndaǵy Tótenshe jáne ókiletti elshisi, Armenııa Respýblıkasynyń Bilim, ǵylym, mádenıet jáne sport mınıstri, Armenııa Respýblıkasy Syrtqy ister mınıstriniń orynbasary, «Armenııa-Qazaqstan» parlamentaralyq dostyq tobynyń jetekshisi, Prezıdent ákimshiligi jáne BAQ ókilderi, QR Syrtqy ister mınıstrliginiń qyzmetkerleri, magıstranttar, doktoranttar, sondaı-aq akademııa qyzmetkerleri qatysty.
