Sýret: gov.kz
Senat depýtattary, Parlamentarızm ınstıtýty, Ulttyq ekonomıka, Sıfrlyq damý, ınnovasııalar jáne aeroǵarysh ónerkásibi mınıstrliginiń ókilderi dóńgelek ústel basynda Memleket basshysynyń Joldaýyn iske asyrý aıasynda memlekettik qyzmettiń jetistigine toqtaldy.
Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Nurlan Beknazarov tıimdi memlekettik qyzmettiń eldiń áleýmettik-ekonomıkalyq damýy men azamattardyń ál-aýqatyn arttyrýda mańyzdy ról atqaratynyn atap ótti.
Al Memlekettik qyzmet isteri agenttiginiń tóraǵasy Darhan Jazyqbaı Prezıdent Jarlyǵymen bekitilgen Memlekettik qyzmetti damytýdyń 2024–2029 jyldarǵa arnalǵan tujyrymdamasynyń negizgi mindetteri jáne olardy júzege asyrý josparlarymen tanystyrdy. Olar memlekettik qyzmetti adamǵa baǵdarlanǵan jáne servıstik sıpatta ilgeriletýdi, memlekettik apparatty kásibılendirýdi, adam resýstaryn basqarý úderisterin sıfrlandyrýdy qamtıdy.
Agenttik tóraǵasy memlekettik qyzmette ınnovasııalyq HR quraldaryn, satylas mansaptyq ilgeriletý tetikterin engizý, mektep jáne joǵary oqý oryndary deńgeıinde erte kásiptik baǵdarlaýdy qolǵa alý, jaýapty laýazymdarǵa rotasııany keńeıtý, memlekettik qyzmetshilerge áleýmettik kepildikterdi jaqsartý qarastyrylatynyn aıtty.
– Memlekettik qyzmetti damytýdyń jańa tujyrymdamasy «Eń aldymen adam» qaǵıdasy negizinde memlekettik qyzmetti zaman talabyna saı jetildirýge baǵyttalyp otyr. Memlekettik qyzmet ákimshilik rásimderdi júzege asyrý ǵana emes, ol eń aldymen memlekettik qyzmetshiniń qoǵam aldynda jaýapkershilikti sezinip, zań men tártipke baǵyna otyryp qyzmet etýi, – dedi D.Jazyqbaı.
Aıta ketsek, byltyr agenttik memlekettik qyzmetti sıfrlandyrýǵa qatysty josparlarymen tanystyrǵan edi. Agenttik tóraǵasynyń aıtýynsha, keıingi jyldary osy baǵytta júıeli jumys atqaryldy. Memlekettik qyzmetke kirý úderisindegi bıýrokratııa qysqartylyp, kadrlardy irikteýdiń jańa avtomattandyrylǵan júıesi engizilgen. Nátıjesinde, úmitkerlerdiń memlekettik qyzmetke qabyldaýdyń ashyqtyǵy men ádildigine degen senimi ulǵaıyp, konkýrsqa qatysatyn kandıdattardyń sany eki esege artqan. Máselen, azamattardyń qaıta test tapsyrý merzimi 5 esege – 15 kúnnen 3 kúntizbelik kúnge azaıǵan. Memlekettik qyzmetke ornalasqysy keletin azamattar buǵan deıin oblys nemese qala ortalyǵyndaǵy testileý zaldaryna baryp test tapsyratyn. Qazirgi jańa irikteý júıesinde úmitkerler 24/7 formatta onlaın, álemniń kez kelgen jerinen test tapsyra alady. Buǵan qosa konkýrs qorytyndysyn adam faktorynsyz platforma barlyq irikteý kezeńiniń nátıjesin avtomatty túrde ózi esepteıdi. Sonymen qatar jeke jáne kvazısektor kandıdattaryna jańa biliktilik talaptary engizilip, olardyń salalyq tájirıbesi memlekettik qyzmet tájirıbesine teńestirildi.
– Ártúrli saladan bilikti mamandardy konkýrstan tys ákimshilik memlekettik qyzmettiń basshylyq laýazymdaryna birden taǵaıyndaý ınstıtýty engizilip otyr. Qazirgi ýaqytta osy tártippen 550-den asa maman agenttikpen kelisý arqyly taǵaıyndaldy. Byltyr qabyldaǵan zańǵa engizilgen ózgeristerge sáıkes, óńirlik kadrlyq rezervteri qalyptastyrylyp, oqý ornyn úzdik bitirgen jas túlekterge qyzmetke konkýrssyz ornalasý múmkindigi berilgen edi. Osy oraıda zań kúshine engen ýaqyttan beri 380-nen asa túlek konkýrstan tys, aýdandyq, aýyldyq deńgeıdegi bastapqy laýazymdarǵa taǵaıyndaldy. О́ńirlik kadrlyq rezervterge 505 adam iriktelip alyndy, – dedi D.Jazyqbaı.
Is-sharada depýtattarǵa memlekettik qyzmettiń tartymdylyǵyn arttyrýǵa múmkindik bergen «eQyzmet» júıesindegi memlekettik qyzmetke irikteý rásimderin sıfrlandyrý, kadrlyq bıznes-úderisterdi ońtaılandyrý jumystary tanystyryldy.
