Keshti «Bolashaq» halyqaralyq baǵdarlamasy boıynsha Bremen qalasynyń Constructor ýnıversıtetinde bilim alyp júrgen qazaqstandyq azamattar uıymdastyrdy. Merekelik keshke qazaq jastary men aǵa býyn ókilderinen 70-ke jýyq adam qatysty.
Keshte Ulttyq mereke – Respýblıka kúniniń mán-mańyzy men tarıhy jaıly prezentasııa kórsetilip, tanystyrý jasaldy. Sonymen qatar án shyrqalyp, kúı tartylyp, dombyranyń qońyr áýeni qalyqtady.
– Men Astana qalasyndaǵy S.Seıfýllın atyndaǵy QazATÝZ-diń «Tehnologııalyq mashınalar men jabdyqtar» kafedrasynyń meńgerýshisi bolyp qyzmet atqaramyn. Memleketimiz uıymdastyryp otyrǵan «500 ǵalym» jobasy aıasynda Germanııanyń Bremen qalasyna kelip, ǵylymı taǵylymdamadan ótip jatqanymyzǵa 9 aıdaı ýaqyt boldy. Búgin 25 qazan – Respýblıka kúnine oraı Constructor ýnıversıtetinde óte tamasha merekelik kesh ótti. Elden alys júrsek te merekelik keshti uıymdastyrǵan azamattarǵa rızashylyǵymdy bildirip, alǵys aıtamyn. Merekelik kesh tek resmı túrde ǵana emes qazaqtyń ulttyq taǵamdary qoıylǵan saltanatty dastarhanǵa ulasty. Keshke kelgen jastar men aǵa býyn ókilderi jaqsy áser alyp qaıtty, taǵlymy mol kezdesý boldy, - dedi «Bolashaq» halyqaralyq baǵdarlamasynyń «500 ǵalym» jobasy aıasynda Constructor ýnıversıtetinde tájirıbeden ótýshi ǵalym Muratbek О́serbaev.
Al Bremen qalasyndaǵy Constructor ýnıversıtetiniń 3-kýrs stýdenti Mereı Esenǵalıeva onda buryn mundaı kesh uıymdastyrylmaǵanyn alǵa tartty.
– Men kompıýter ǵylymdary mamandyǵy boıynsha 3-kýrsta oqyp júrmin. Osy mamandyqty ıgergen soń taǵy da birneshe jyl Eýropa elderinde tájirıbe jınap, sosyn elge baryp bıznes ashqym keledi. Búgin bizdiń bir sharýalarymyz bar edi, biraq osy keshke arnaıy ýaqyt bólip kelgenbiz. О́te jaqsy áser aldyq. Buryn-sońdy búgingideı kesh uıymdastyrylǵan joq. Respýblıka kúnine arnaıy uıymdastyrylǵan keshimiz keremet ótti. О́zimizdiń qaragózderimizdi kórip, elge degen saǵynyshymyzdy bastyq, - deıdi ol.
Is-shara sońynda jastar ózderiniń alǵan áserlerin aıtyp, uıymdastyrýshylarǵa rızashylyq bildirdi. Merekege arnalǵan jıyn sońy jastardyń bı keshine ulasty.
Aıbarsha JAQSYLYQ, Bremen qalasy
