Foto: gov.kz
Qala ákimdiginiń resmı saıtynyń málimdeýinshe is-sharaǵa QR óńirlerinen mektep parlamentteriniń 20-ǵa jýyq prezıdenti men elordalyq máslıhat depýtattary qatysty. Ashylý saltanatynda Astana qalasy máslıhaty tóraǵasynyń m.a. Asqar Smaǵulov quttyqtaý sóz sóıledi.
«Búgin biz jastardy, mektep oqýshylaryn tolǵandyratyn máselelerdi talqylaý úshin jınaldyq. Áriptesterim máslıhattyń qyzmeti týraly aıtyp, óz tájirıbelerimen bólisedi. Sizderdiń árqaısyńyz óz mektebińizde túrli máseleler men qıyndyqtarǵa kezigip, olardy sheshýdiń biregeı joldaryn taýyp, jańa ıdeıalar engizip, mektep ómirin qyzyqty ári mazmundy etýge kómektesetin is-sharalar men jobalardy uıymdastyryp jatyrǵandaryńyzǵa senimdimin. Sizderdiń kúsh-jigerlerińiz qazirdiń ózinde jemisin berip jatyr, biraq bul atqarylýǵa tıisti jumystardyń basy ǵana ekenin túsiný mańyzdy», dedi ol.
Asqar Smaǵulov sondaı-aq mundaı kezdesýler jastar úshin paıdaly bolatynyn atap ótti.
«Osy ýaqytty tıimdi paıdalanyńyzdar, jobalaryńyzben, tájirıbelerińizben bólisińiz, suraqtar qoıýdan qoryqpańyz, tolǵandyratyn taqyryptardy talqylańyz. Bul kezdesý sizderge jańa dostar men pikirlesterdi tabýǵa, sizdiń jalǵyz emes ekenińizdi túsinýge múmkindik beredi. Al biz óz tarapymyzdan sizderdiń ıdeıalaryńyzdyń júzege asýyna qoldaý kórsetip, tabysqa jetýlerińiz úshin bar kúshimizdi salamyz», dep túıindedi sózin Asqar Smaǵulov.
Is-sharany uıymdastyrýshylar atap ótkendeı, kezdesýdiń negizgi maqsaty – jastar men máslıhat ókilderi arasyndaǵy baılanysty nyǵaıtý, sondaı-aq balalar men jasóspirimderdiń áleýmettik bastamalarǵa belsendi qatysýy úshin jaǵdaı jasaý.
