Bıylǵy jyldyń 31 qazan – 1 qarashasynda Taraz qalasyndaǵy «Ark MS» qonaq úıiniń májilis zalynda QR Mádenıet jáne aqparat mınıstrliginiń Din isteri komıtetiniń qoldaýymen jáne «Rýhanı jańǵyrý» qoǵamdyq qorynyń uıymdastyrýymen din máseleri boıynsha bilikti mamandardy daıyndaýǵa baǵyttalǵan is-shara ótti.
Sharaǵa «Din zertteý ortalyǵynyń», meshitterdiń, orta jáne joǵary oqý oryndarynyń mamandary, ımamdary, psıhologtary men teologtary qatysty. Jıynda din máseleleri boıynsha túsindirý tobynyń músheleri – Nur-Múbarak Egıpet ıslam mádenıeti ýnıversıteti, Dintaný kafedrasynyń PhD doktory Botaqaraev Baýyrjan Qýanyshbaıuly jáne dintanýshy, ıslamtanýshy, PhD, Abaı atyndaǵy Qazaq ulttyq pedagogıkalyq ýnıversıteti, Saıasattaný jáne áleýmettik-fılosofııalyq pánder kafedrasynyń aǵa oqytýshysy Abylov Tuńǵysh Talǵatuly dáris oqydy.
Baýyrjan Qýanyshbaıuly «Dástúrli ıslamnyń qundylyqtary» taqyrybynda jahandyq jaǵdaıdaǵy terrorızm men dinı ekstremızmge qarsy kúrestiń quqyqtyq negizderine toqtala otyryp, din salasyndaǵy memlekettik saıasattyń negizgi baǵyttaryn, prınsıpterin qatysýshylarǵa túsindirdi. Sondaı-aq «Qazaq handyǵy men egemendikten keıingi eldegi dinı ahýal» taqyrybynda semınardyń birinshi kúnin aıaqtady.
Tuńǵysh Talǵatuly «Islamdaǵy jańa aǵymdar: negizgi sıpattamalary men ıdeologııalyq erekshelikteri» taqyryby aıasynda tyńdaýshylarǵa dinı sananyń erekshelikterin, dindarlyqtyń qurylymyn, jeke tulǵanyń jáne qoǵamnyń dinı damý aıyrmashylyqtaryn túsindirdi. Sondaı-aq «Qazirgi ıslamdaǵy dástúrshil jáne modernıstik aǵymdardyń ıdeıalyq bastaýlary» taqyrybymen Qazaqstandaǵy dinı jaǵdaılardy túsindire otyryp, oǵan qatysty kúrdeli suraqtarǵa jaýap berý ádisterin úıretti.
Sonymen qatar, semınarlar men trenıngter barysynda qatysýshylar tarapynan dáriskerlerge suraqtar qoıylyp, tujyrymdy jaýaptar alyndy.
