Foto: Aqorda
«Qazaqta «Eńbegine qaraı – ónbegi» degen sóz bar. Muny, eń aldymen, aýyl halqynyń eren eńbeginiń jemisi deýge bolady. Memleket tarapynan da tıisti jumys júrgizildi, qajetti kómek berildi», degen El Prezıdentiniń sózinshe qazirgi ýaqytta elimizde jańa ekonomıkalyq baǵdar sheńberinde naqty sharalar qolǵa alynyp jatyr.
«Júıeli jumystardyń nátıjesinde ınflıasııa deńgeıi tómendedi (bıylǵy qazan aıynda jyldyq ınflıasııa 8,5 paıyzdy qurady), sondaı-aq ulttyq ekonomıkanyń ósimi 2024 jyldyń qańtar-qazan aılarynda 4 paıyzdan asyp, jaqsy qarqyn aldy. Munaıdan tys salalardy damytý arqyly oń dınamıka baıqalady. Bul – mańyzdy úderis. Ishki jalpy ónim ósiminiń úshten ekisinen astamy saýda, óńdeý ónerkásibi, qurylys pen aýyl sharýashylyǵyna tıesili. Osy baǵyttaǵy belsendi jumysty jalǵastyrý kerek», dedi Prezıdent.
Memleket basshysynyń aıtýynsha Qazaqstan shet elderden tikeleı ınvestısııa tartý boıynsha Ortalyq Azııada kósh bastap tur.
«Bıyl jetekshi halyqaralyq reıtıng agenttikteri Qazaqstannyń qazirgi nesıe reıtıngi ınvestısııalyq senimdilik deńgeıinde turǵanyn rastady. Qyrkúıekte Moody’s agenttigi Qazaqstannyń uzaqmerzimdi reıtıngin «Turaqty» deńgeıine kóterdi. Bul – Táýelsiz Qazaqstan tarıhyndaǵy eń úzdik nátıje», dedi Qasym-Jomart Toqaev.
