Foto: Aqorda
Prezıdenttiń aıtýynsha qazir jahandyq azyq-túlik naryǵynda báseke kúsheıip keledi. Oǵan tótep berý úshin ǵylymdy damytýǵa basa mán berý kerek. Sonyń ishinde tuqym sharýashylyǵyn jandandyrý – strategııalyq mindettiń biri.
«Kartop pen qant qyzylshasy boıynsha otandyq tuqymnyń úlesi 10 paıyzǵa da jetpeıdi. Osyndaı máselelerdi shuǵyl sheshý qajet. Bıyl Dándi-daqyldar seleksııasy men tuqym sharýashylyǵyn damytý týraly keshendi jospar qabyldandy. Naqty mindetter qoıyldy. Úkimetke dıqandardy elimizde óndirilgen tuqymmen qamtamasyz etýdi tapsyramyn. Bul kórsetkishti 2028 jyly 80 paıyzǵa jetkizý qajet. Al joǵary sapaly (ıaǵnı, elıtalyq) tuqymnyń úlesi keminde 15 paıyz bolýy kerek. Ol úshin sheteldiń ozyq tájirıbesin zerttegen jón. Men jaqynda fransýz kásipkerlerin osy saladaǵy ınvestısııalyq jobalardy birge júzege asyrýǵa shaqyrdym», dedi Prezıdent.
Qasym-Jomart Toqaev jýyrda Mońǵolııaǵa memlekettik saparmen barǵan kezde atalǵan eldiń basshysymen eki kóshpendi halyqtyń urpaǵy retinde jylqy týraly da aıtqanyn tilge tıek etti.
«Biz «Tegimiz – túrki, túligimiz – jylqy» dep, arǵymaqty aıryqsha qadirlegen elmiz. Tutas tarıhymyz tulpardyń tuıaǵymen jazylǵan. Jalpy, qazaqtyń miner kóligi de, isher asy da jylqymen tyǵyz baılanysty. Saýmal men qymyzdyń san túrli dertke shıpa ekeni barshaǵa málim», dedi Prezıdent.
Memleket basshysynyń aıtýynsha qazir elimizde jylqy sany úzdiksiz ósip keledi. Bul – jaqsy úrdis.
«Degenmen asyl tuqymdy jylqynyń úlesi bir paıyzǵa da jetpeıdi, ıaǵnı 4,2 mıllıon jylqynyń 40 myńy ǵana asyl tuqymdy. Sondyqtan mal tuqymyn asyldandyrý jumysyna basa mán bergen jón. Qazaqstanda jylqynyń birneshe túri bar. Onyń ishinde qazaqpen birge jasap kele jatqan jabynyń orny erekshe. Keıin oǵan Qostanaı, Kóshim jáne Muǵaljar tuqymdary qosyldy. Árqaısysynyń óz ereksheligi bar. Men buǵan deıin Adaı jylqysy Mańǵystaýdyń baǵa jetpes qazynasy ekenin aıttym. Ony álemge tanytý úshin naqty sharalar qabyldaýdy tapsyrdym. Qazir Adaı jylqysy resmı túrde bólek tuqym retinde tirkeldi. Bul arǵymaqtar Uly dala joryǵynda, basqa da alaman báıgelerde top jaryp júr. Qostanaı jylqysy da myqty ekeni belgili, alaıda, joǵalyp ketýdiń az-aq aldynda tur, nebári 280 bas qaldy. Sondyqtan jylqynyń sanymen qatar, sapasyn arttyrý – mańyzdy mindet» dedi Prezıdent.
Memleket basshysy bıyl qazaq jylqysynyń tuqymyn saqtaý jáne kóbeıtý úshin arnaıy zań qabyldanǵanyn atap ótti.
«Endi bul baǵytta taǵy bir mańyzdy qadam jasaımyz. Men Úkimetke Jylqy sharýashylyǵy ınstıtýtyn qurýdy tapsyramyn. Bilikti mamandar muny kópten beri aıtyp júr. Quzyrly organdar qysqa merzim ishinde osy máseleni pysyqtap, qarjy kózderin naqtylaýy kerek», dedi Prezıdent.
