Foto: Iýrıı Bekker
Bir emes, úsh birdeı joǵary oqý ornynyń fotoónerdi meńgerip júrgen stýdentteriniń qyzyǵýshylyǵyn oıatqan ilkimdi joba «Shevron» kompanııasynyń demeýshiligimen «EcoForming» ekologııa jáne bilim berý qorymen birge Qazaqstan Zoologııa ınstıtýty men «National Geographic Qazaqstan» jýrnalynyń qoldaýymen júzege asyrylyp jatyr.
Joba avtorlarynyń aıtýynsha, jańa saıt ınternet-paıdalanýshylarǵa Qazaqstannyń jan-janýarlar álemin keńinen nasıhattaýdy, ań men qustardyń biregeıligin kórsetýdi maqsat etken. Soǵan oraı, árbir tirshilik ıesiniń túr-sıpaty men erekshelikterin tanytatyn joǵary sapaly portrettik fototúsirilimder jasalǵan. Fotogalereıa jobany damytý barysynda tyń derektermen, jańa fotosýrettermen tolyǵa bermek.
Bir jaǵynan «Qazaqstannyń tumsa tabıǵaty» ýeb-saıty stýdentter men oqýshylar úshin ǵana emes, baıtaq elimizdiń faýnasyn zertteýshilerine de kórnekti ári baǵaly derekqor retinde qyzmet atqarady. Boıaýy qanyq platformanyń biregeıligi sonda – munda tumsa tabıǵattaǵy jan-janýarlar dúnıesin tanyp-bilgisi keletin zertteýshiler men áýesqoılarǵa ańdar men qustardyń portrettik hám tabıǵı ortadaǵy joǵary sapaly fotosýretteri usynylmaq.
Tamasha jobanyń tusaýkeser rásiminde «Shevron» kompanııasynyń áleýmettik ınvestısııalar boıynsha keńesshisi Leıla Aıtmuhanova men jobalyq komanda ókili Qanat Abashov jumystardyń qalaı júrip jatqany jaıynda qyzyqty baıandady.
Osy jobadaǵy eń qıyn da qyzyqty jumysty atqarǵan fotograftar – «National Geographic Qazaqstan» jýrnalynyń shef-fotografy Erbolat Shadrahov pen tumsa tabıǵat fotografy Vladıslav Iаkýshkınge sóz berilgende, kózmergender elimizdiń zoobaqtary men ulttyq qoryqtardaǵy qyzyqty sátterdi erekshe ásermen áńgimeledi.
