Ákimdiktiń málimetinshe, jańa kóshe Astananyń Esil aýdanynda ornalasqan, onyń uzyndyǵy 1100 metrdi quraıdy. Túrkistan kóshesinen Uly Dala dańǵylyna deıin sozylady.
«Búgin elordada memleket jáne qoǵam qaıratkeri Nurlan Balǵymbaev atyndaǵy kóshe paıda boldy jáne eskertkish taqta ornatyldy», dep habarlaıdy qala ákimdiginiń baspasóz qyzmeti.
Saltanatty sharaǵa qala ákimdiginiń, Energetıka mınıstrliginiń ókilderi, munaı-gaz salasynyń ardagerleri, zııaly qaýym, sondaı-aq Nurlan Balǵymbaevtyń otbasy men týǵan-týystary qatysty.
Energetıka vıse-mınıstri Álibek Jamaýov Balǵymbaevtyń Qazaqstandaǵy munaı-gaz salasyn damytýǵa sińirgen eńbegin jáne onyń munaı-gaz ken oryndaryn barlaýdaǵy, zamanaýı tehnologııalardy engizýdegi, kadrlar daıarlaýdaǵy jáne jańa kásiporyndardy qurýdaǵy basty rólin atap ótti.
Astana qalasy ákiminiń orynbasary Eset Báıken bul oqıǵanyń tarıhı mańyzyna toqtaldy.
«Nurlan О́tepuly el Úkimetin basqarǵan kezde kóptegen ıgi reformalardy qolǵa alyp, jumysty jaqsartýǵa kóp úles qosty. Al munaı-gaz salasyna jetekshilik etken jyldary eldiń ınvestısııalyq áleýetin kóterip, salaǵa tyń serpin berdi. Ol sanaly ǵumyryn el ıgiligine, munaı-gaz salasyn damytýǵa arnap, abyroımen ǵumyr keshti. Atqarǵan kóp isi táýelsiz el tarıhyna altyn árippen jazylǵany sózsiz. Elge qyzmet etken qaıratkerlerdi ulyqtaý, jas urpaqqa nasıhattaý – qajet is. Osy arqyly myqty azamattar býynyn tárbıeleı alamyz. Nurlan О́tepulynyń esimi eshqashan umytylmaıdy dep senimmen aıta alamyn», dedi elorda ákiminiń orynbasary Eset Baıken.
Aıta keteıik, elordadaǵy bir kóshege Balǵymbaev esimin berý Memleket basshysynyń tapsyrmasy edi.
Nurlan Balǵymbaev 1997-1999 jyldar aralyǵynda Qazaqstannyń premer-mınıstri boldy. Odan keıin «Qazaqoıl» ulttyq munaı-gaz kompanııasy» JAQ jáne «Qazaqstan munaı-ınvestısııalyq kompanııasy» AQ prezıdenti boldy.
Osydan keıin Balǵymbaev 2009 jylǵa deıin QR Tuńǵysh Prezıdentiniń keńesshisi qyzmetin atqardy. Sodan keıin ol ıtalıandyq «Eni» munaı-gaz kompanııasymen jobalardy júzege asyrý jónindegi uıymnyń bas dırektory qyzmetine taǵaıyndaldy. Qazaqstannyń burynǵy premer-mınıstri 2015 jyldyń qazan aıynda qaıtys boldy.
