Foto: Aqorda
Memleket basshysynyń jazýynsha, Qazaqstan men Reseıdiń qarym-qatynasy – berik ári myzǵymas dostyqtyń shynaıy kórinisi.
«Eki eldiń strategııalyq seriktestigi men odaqtastyǵy tyǵyz astasyp jatqan tarıhı jáne mádenı baılanystarǵa, sondaı-aq, qos halyqtyń bolashaǵyna qatysty ortaq jaýapkershilikke negizdelgen. Buryn-sońdy bolmaǵan jahandyq syn-qaterlerge qaramastan, bizdiń elderimiz tatý kórshilik pen san salaly yntymaqtastyqtyń úlgisin kórsetip keledi», dep jazdy Qasym-Jomart Toqaev.
Elder arasyndaǵy bul yntymaqtastyqqa ortaq múdde, ózara syılastyq, eń joǵary deńgeıdegi syndarly saıası dıalog arqaý bolyp otyrǵanyn erekshe atap ótken jón.
«Reseı Prezıdenti Vladımır Vladımırovıch Pýtın ekeýmiz únemi habarlasyp otyramyz. Bir-birimizge degen qurmetke negizdelgen bizdiń qarym-qatynasymyz emen-jarqyndyǵymen jáne iskerlik sıpatymen erekshelenedi. Mundaı tyǵyz baılanys týyndaǵan máselelerdi jedel sheshýge jáne memleketterimizdiń arasyndaǵy shynaıy dostyq qatynasty nyǵaıta túsýge múmkindik beredi. Sońǵy bir jyldyń ózinde Reseı Prezıdenti ekeýimiz tolyqqandy formatta tórt kelissóz júrgizdik. Halyqaralyq is-sharalar aıasynda birneshe márte kezdestik, telefonmen de jıi sóılestik», dep jazdy Qazaqstan Prezıdenti.
Sondaı-aq Prezıdent Qazaqstan men Reseıdiń saýda-ekonomıka salasyndaǵy yqpaldastyǵy turaqty túrde damyp jatqanyn atap ótti.
