Kollaj: Mádenıet jáne aqparat mınıstrligi
«Mýzykanyń altyn ǵasyry» toptamasyndaǵy konsert aıasynda ártister elorda turǵyndary men qonaqtaryna P.Chaıkovskııdiń mýzykalyq murasynyń eń súıikti bólimderiniń biri – onyń romanstarymen kezdesýden umytylmas emosııa men shabyt syılaıdy. Azamat Jyltyrkózov pen Dolores Úmbetálıevanyń názik ınterpretasııasyndaǵy birtýar kompozıtordyń kameralyq-vokaldyq lırıkasy tyńdarmandardy óziniń tereń oılylyǵymen, kórkem beınelerdiń moldyǵymen, ıntonasııanyń ashyqtyǵymen ári sezimderdiń shynaıylyǵymen jigerlendiredi.
«Sred shýmnogo bala...» konsertinen bólek, «Astana Opera» teatrynyń K.Baıseıitova atyndaǵy Kameralyq zalynyń jeltoqsandaǵy baǵdarlamasyna basqa da kóptegen jarqyn sharalar endi.
Sonymen, 6 jeltoqsanda «Eýropa maıtalmandarynyń umytylmas áýenderi» konsertinde K.Baıseıitova atyndaǵy Kameralyq zal sahnasyna vengr pıanısi Derd Oraves shyǵady. Joba Vengrııanyń Qazaqstan Respýblıkasyndaǵy elshiliginiń qoldaýymen júzege asyrylǵan.
«Astana Opera» orkestriniń birinshi skrıpkasy, Qazaqstannyń eńbek sińirgen qaıratkeri Baǵdat Ábilhanov «Mýzykalyq alıans» toptamasynan keshter usynady: 7 jeltoqsanda «Mýzykalyq senbilik» konserti, al 18 jeltoqsanda shaqyrylǵan solıst, Bashqurtstan Respýblıkasynyń eńbek sińirgen mádenıet qyzmetkeri skrıpkashy Vladıslav Samoılovtyń qatysýymen «Paganını murasyn sheber oryndaýshylar» konserti ótedi.
12 jeltoqsanda «Piccolo» teatry jobasy aıasynda elordalyq kórermenderdiń nazaryna premerasy qazan aıynda zor tabyspen ótken teatr repertýaryndaǵy jańa spektakl – A.Vıvaldıdiń «Qaharly Orlando» operasy usynylady.
Táýelsizdik kúni, 16 jeltoqsanda Qazaqstan kompozıtorlar odaǵynyń «Darhan dala» konsertinde «Astana Opera» kameralyq orkestri Qazaqstannyń halyq ártisi Abzal Muhıtdınniń basqarýymen óner kórsetedi.
Jańa jyldyq mereke qarsańynda teatrdyń shyǵarmashylyq ujymy K.Baıseıitova atyndaǵy Kameralyq zaldyń qyzyqty baǵdarlamasyn daıyndady. Astana Opera Halyqaralyq opera akademııasynyń daryndy jas tyńdaýshylary 21 jeltoqsanda dástúrli «Jańa jyldyq ekspromt» konsertinde sahnaǵa shyǵady. Qysqy demalys kúnderi 26-27 jeltoqsanda S.Kıýıdiń «Etik kıgen mysyq» opera-ertegisi kishkentaı kórermenderge merekelik kóńil kúı syılaıdy.
