Foto: Ashyq derekkóz
Jalpy óńir halqynyń 99,8%-y taza aýyz sýmen qamtylǵan. Bıyl Qyzylqoǵa aýdanynyń Qońyraýly, Aqqora aýyly men Mahambet aýdanynyń Bala Oraz eldi mekenine 18,9 shaqyrym sý qubyry júrgizilgen.
Sonymen qatar Mahambet aýdanyna qarasty Atambaev, Kózdiqara, Esmahan eldi mekenderine jalpy uzyndyǵy 61,7 km bolatyn sý qubyryn tartý jumystary aıaqtalýǵa jaqyn. Qos jobanyń nátıjesinde 600 adam taza aýyz sýmen qamtylady. Sondaı-aq Mahambet, Isataı, Qurmanǵazy aýdanynda 16 sý tazartý stansııasy jańǵyrtylyp jatyr.
«Tasqynnyń saldaryna qaramastan halyqty sapaly aýyz sýmen qamtý baǵytynda jumystar júıeli júrip jatyr. Máselen, qalada táýligine 50 myń tekshe metr sý tazalaıtyn №5 súzgi stansııasyn jańǵyrtý jumysyn jyl sońyna deıin aıaqtap, iske qosamyz. Sondaı-aq keler jyly táýligine 60 myń tekshe metr sý tazalaıtyn №6 súzgi stansııasynyń qurylysy bastalady. Bıyl qala aýmaǵynda 60 shaqyrym sý jelisiniń jańǵyrtý jumysyn bastadyq. Onyń 30 shaqyrym sý qubyry temirden plastıkke aýystyryldy. Qalǵan 30 shaqyrymdaǵy jumysty keler jyly aıaqtaımyz. Buǵan qosa qaladaǵy 1950 jyldan beri jóndeý kórmegen, uzyndyǵy 40 km bolatyn káriz jelisin jańartyp jatyrmyz. Búginde bul jumystyń 17 shaqyrymynda jumys aıaqtaldy», dedi S.Shápkenov.
Sondaı-aq Atyraýda 1945 jyldan beri jóndelmegen káriz sorǵy stansııalaryn jańǵyrtý, kúrdeli jóndeý jumysy bastalǵan. 9 káriz sorǵy stansııasy jańǵyrtylyp jatyr. Jyl sońyna deıin beseýindegi jumys aıaqtalady. Oǵan qosa 36 stansııany rekonstrýksııalaý úshin jobalyq smetalyq qujat daıyndalyp jatyr. Al Qulsary qalasynda 14 káriz sorǵy stansııasy kúrdeli jóndeýden ótken.
«Atyraý halqyn alańdatqan basty máseleniń biri – yqsham aýdandardaǵy káriz júıesi. Jaýyn-shashyn kezinde turǵyndardan túsetin shaǵym kóbeıedi. Jerdiń tuzdylyǵy taǵy bar. Máseleni sheship, Atyraý qalasyndaǵy birneshe yqsham aýdandy ortalyqtandyrylǵan káriz júıesine qosý úshin búginde 22 ýchaskege júrgiziletin káriz jelisiniń jobalyq smetalyq qujaty jasaqtaldy. 2026 jyldan bastap júrgizilgen káriz jelisi qalanyń oń jaǵalaýyndaǵy kárizdik-tazartý ǵımaratyna qosylatyn bolady. Jalpy bul jumys 5 jyldy alatyndyqtan, kezeń-kezeńimen isteledi, dedi óńir basshysy Serik Shápkenov.
