Foto: Aqorda
Onyń pikirinshe, aýyl sharýashylyǵyndaǵy sý únemdeýge jáne energııanyń jańartylatyn kózderin damytýǵa salǵan strategııalyq ınvestısııalar ekonomıka turaqtylyǵyn arttyryp qana qoımaı, qorshaǵan ortaǵa qysymdy tómendetedi.
«Sýda shekara bolmaıdy. Ol qoǵamdastyqtar men ekojúıelerdi baılanystyrady. Qazaqstan Halyqaralyq Araldy qutqarý qorynyń tóraǵasy retinde aımaqtyq yntymaqtastyq pen birlesken is-qımyldyń ilgerileýine qoldaý kórsetedi. Bizdiń oıymyzsha, klımattyń ózgerýimen kúrestiń aldyńǵy shebinde júrgen memleketterdiń dıalogty jandandyryp, halyqaralyq yqpaldastyqty damytýy jáne sýǵa qatysty jobalardy júzege asyrý úshin resýrstaryn jumyldyrýy óte ózekti. Osy maqsatqa sáıkes, Qazaqstan búgin jahandyq sý daǵdarysyn sheshýge múddeli taraptardy biriktiretin jáne sý resýrstaryn basqarý isinde jańashyldyqty jaqtaıtyn One Water Vision koalısııasyna erekshe yqylaspen qosyldy. Elimiz 2026 jyly Birikken Ulttar Uıymynyń qoldaýymen О́ńirlik klımat konferensııasyn ótkizedi», dedi Prezıdent.
Memleket basshysy 2030 jylǵa deıingi ornyqty damý salasyndaǵy jahandyq basymdyqtardyń biri sý resýrstary ekenin eske saldy.
«Sý qaýipsizdigi – jaı ǵana tehnıkalyq nemese ekologııalyq másele emes, bul moraldyq ımperatıv. Sý qaýipsizdigi problemasyn sheshý One Water qaǵıdaty aıasyndaǵy kópjaqty dıalogty damytýdy talap etedi. Qazaqstan sý resýrstaryn jahandyq aýqymda basqarý isin nyǵaıtýdy kózdeıtin osy ujymdyq áreketke óz úlesin qosýǵa daıyn», dedi Qasym-Jomart Toqaev.
Sammıtte Saýd Arabııasynyń Taq murageri, Premer-mınıstri Muhammed ben Salman Ál Saýd, Fransııa Prezıdenti Emmanıýel Makron, Dúnıejúzilik bank tobynyń prezıdenti Adjaı Banga, Sý resýrstary ekonomıkasy jónindegi jahandyq komıssııanyń teń tóraǵasy (GCEW) Iohan Rokstrem, sondaı-aq basqa da elderdiń basshylary, halyqaralyq uıymdardyń, qaýymdastyqtar men kompanııalardyń jetekshileri sóz sóıledi.
