«Biz bul forýmda áıelderdi alańdatatyn máselelerdi talqylaǵymyz keldi, sebebi qoǵamda genderlik teńdik máselesi áli kúnge deıin ózekti bolyp otyr. Páterdiń esigi jabylǵanda onyń ar jaǵynda ne bolyp jatqanyn bilmeımiz. Qoǵamda bul máseleler búkpesiz aıtyla bastady. Áıelderdiń turmys qurǵanǵa deıin óz úıi bolǵany jón dep árdaıym aıtyp júremin. Otbasy bolǵan soń alda ne bolaryn bilmeımiz. Barlyq adam tatý-tátti ómir súrsem deıdi. О́kinishke qaraı, keıde áıelder otbasynda zábir kórip, barar jer tappaıdy. Sondaıda olarǵa erterek alǵan páteri pana bolady», dedi «Otbasy bank» AQ Basqarma tóraǵasynyń orynbasary Nurlan Aqshanov is-sharanyń ashylýynda.
Otbasy bank – qazaq áıelderin qoldaýǵa erekshe kóńil bóletin bank. Onyń aıqyn dáleli – 2021 jyly iske qosylǵan áıelderge arnalǵan «Umaı» ıpotekasy.
«Búgingi forým árqaısymyzdy alańdatatyn ózekti máselelerdi ǵana emes, sondaı-aq bir-birimizdi qoldaýǵa, tájirıbe almasyp, kózqarastarymyzdy bólisýge múmkindik berip otyr. Otbasy bank 21 jyl boıy júz myńdaǵan azamattyń aqsha jınap, baspanaly bolýyna kómektesti. Eń qyzyǵy, depozıt ashyp, aqsha jınaýǵa kóbinese áıelder bastama kóteredi. Búginde Otbasy bankte áıelder 1,6 mıllıon depozıt ashyp, jalpy 1,2 trıllıon teńge jınaǵan. Sonyń ishinde eń kóp jınalǵan depozıttegi soma 52 mıllıon teńgeni quraıdy. Bul áıelderdiń qarjysyn basqaryp, bolashaǵyn josparlaı alatynyna dálel bolyp otyr», dedi «Otbasy bank» AQ Basqarma tóraǵasynyń orynbasary Elmıra Ryspekova.
Onyń aıtýynsha, ıpotekalyq nesıe alýshylar arasynda da áıelder (58,7%) alǵa shyqqan. Úı satyp alýǵa nesıe alatyn áıelderdiń ortasha jasy 36-45 jasty quraıdy. Al qaryzdyń ortasha somasy – 13,2 mıllıon teńge. Nesıeni 10-14 jylǵa alady.
Otbasy bank pen Azııa damý banki birlesken «Umaı» baǵdarlamasy áıelderdiń baspana máselesin sheshýde mańyzdy ról atqardy. Osy baǵdarlama arqyly 2021 jyldan beri 3 660 áıel úıli boldy.
«Qazaqstandaǵy árbir áıeldiń jylýǵa toly óz úıi bolsa eken deımiz. Otbasynyń uıytqysy bolyp otyrǵan áıelderdiń erkindigi, ekonomıkalyq belsendiligi men teńdik úshin olardy qoldaý óte mańyzdy. 1 qarashada Otbasy bank Azııa damý bankimen seriktestik týraly memorandýmǵa qol qoıdy. Keler jyly «Umaı» baǵdarlamasy men «Jasyl ıpoteka» qaıta iske qosylady degen úmittemiz», dedi Elmıra Ryspekova.
Genderlik teńdikke qosqan úlesi úshin Otbasy bank Ortalyq Azııa óńirlik ekonomıkalyq yntymaqtastyq baǵdarlamasynyń marapatyna ıe bolǵan Qazaqstandaǵy alǵashqy bank atandy.
Otbasy banktiń Almaty qalalyq fılıalynyń dırektory Danagúl Túsipova «Umaı» ıpotekasynyń sharttary týraly aıta ketti. Baǵdarlamaǵa Qazaqstannyń barlyq óńirindegi áıelder qatysady jáne turǵylyqty jerine qaramastan kez kelgen aımaqtan úı ala alady. Boljaldy eń joǵary nesıe somasy – 50 mıllıon teńge, al qaryz alýshynyń jasy 18-den 65 jasqa deıin. Bastapqy jarna somasy – 20% bolady dep kútiledi.
«Búgingi is-shara áıelderge osy jáne ózge de baǵdarlamalar týraly aqparat berý maqsatynda ótkizilip otyr. «Umaı» baǵdarlamasyna qatysatyn áıelderdiń atynda úıiniń bar-joǵy tekserilmeıdi. Úıi bolsa da osy baǵdarlama arqyly ekinshi úıin satyp ala alady. Bul baǵdarlamanyń maqsaty – áıelderdiń turmystyq jaǵdaıyn jaqsartý, kúndelikti ómirin jeńildetý, ıaǵnı, jumysy, balabaqsha ne mekteptiń qasynan úı alýyna kómektesý. «Umaı» ıpotekasynyń paıyzdyq mólsherlemesin jaqynda aıtamyz», dedi Danagúl Túsipova.
Baǵdarlama boıynsha úıdi bastapqy naryqtan da, ekinshi naryqtan da tańdaý múmkindigi berilmek. Degenmen ekinshi naryqtan 2016 jyldan beri salynǵan úılerdi ǵana satyp alýǵa bolady. Tabys boıynsha shekteý bar: otbasynyń eń joǵary taza aılyq tabysy 950 myń teńgeden aspaýǵa tıis. О́ziniń tabysy jetpeı qalsa eki qaryz alýshyny tartýǵa bolady. Bul talaptar áli de talqylanyp jatyr.
Jalpy «Umaı» baǵdarlamasy aıasynda páterdi satyp alyp qana qoımaı, páterge jóndeý jumystaryn júrgizýge bolady.
«Umaı» áıelder forýmynda osy baǵdarlama arqyly baspanaly bolǵan Evgenııa Gýnınamen tildestik. Úsh jyl buryn О́skemennen Almatyǵa qonys aýdarǵan Evgenııa Otbasy bank arqyly qalaı úıli bolǵanynyn aıtyp berdi.
«Bul baǵdarlama týraly ózim eki jyl buryn bildim. Ipotekalyq baǵdarlamalardyń qaısy tıimdi ekenin zerttep júrdim de, «Umaıǵa» toqtadym. Baǵdarlamanyń sharttary unady. Bastapqy jarna somasy kóp bolmady. Basqa bankterge qaraǵanda paıyzdyq mólsherleme de az. Almatynyń ortalyǵynan 14 mıllıon teńgege úı taýyp, on jylǵa ıpoteka aldym. Depozıtke aqsha jınap, oǵan qosa zeınetaqy jınaǵymdy jumsap, eki jylda qaryzdy tolyq tólep tastadym. Búginde «Umaı» ıpotekasy áıelderge arnalǵan eń jaqsy baǵdarlama dep esepteımin. Basqa baǵdarlamalardy da kórdim. Úsh jyl depozıtke aqsha jınap, úı aqysynyń qalǵan elý paıyzyn tóleýge bolady. Degenmen depozıtim ashylǵanyna úsh jyl bolmaǵan soń «Umaı» baǵdarlamasynyń sharttaryna saı keldim. Osylaısha Almatynyń qaq ortasynan 33 jasymda úı alyp, eki jylda qaryzdy tolyq ótep tastadym. Sondyqtan áıelderge qoryqpaı Otbasy bankte depozıt ashyp, aqsha jınańyzdar degim keledi», dedi IT kompanııada jumys isteıtin Evgenııa Gýnına.
Forým barysynda Otbasy bank qyzmetkerleri qatysýshylarǵa depozıtte aqsha jınaý, ıpotekalyq baǵdarlamalarǵa qatysý sharttaryn aıtyp berdi. Otbasy bank 2024 jyly «Otaý» jáne «Naýryz» atty eki turǵyn úı baǵdarlamasyn iske qosty. Sonyń arqasynda 10 myń azamat úıli boldy.
Budan bólek, Otbasy bank bilim berý bastamalaryna da qoldaý kórsetedi. Bıyldan bastap bankte «Aqyl» bilim berý depozıtin ashýǵa bolady. Qazirdiń ózinde 63 myń shot ashylǵan. Onyń teń jartysy qyzdarǵa arnalǵan. Osylaısha qamqor ata-analar qazirden balasynyń bolashaqta sapaly bilim alyp, óz isiniń mamany bolýy úshin úles qosyp otyr.
