Foto: Aqorda
Memlekettik keńesshi Erlan Qarın Qazaqstan Jazýshylar Odaǵynyń qurylǵanyna 90 jyl tolýyna oraı uıymdastyrylǵan saltanatty jıynǵa qatysyp, Memleket basshysy Qasym-Jomart Toqaevtyń quttyqtaý hatyn oqyp berdi.
«Qadirli qaýym!
Sizderdi Qazaqstan Jazýshylar odaǵynyń qurylǵanyna 90 jyl tolýymen quttyqtaımyn!
Jazýshylar odaǵy – rýhanııatymyzdyń altyn dińgegi.
Bul uıym qalamgerlerimizdiń kásibı qaýymdastyǵy retinde tól ádebıetimiz ben mádenıetimizdi órkendetýge jáne ony álemge tanytýǵa zor yqpal etedi. Sóz óneriniń qarashańyraǵyn ulttyq biregeıligimizdiń berik tuǵyry deýge bolady. Aqyn-jazýshylarymyz ultty uıystyrý jolynda qaltqysyz qyzmet etip júr. Aǵa býyn negizin qalaǵan osy ulaǵatty dástúr úzdiksiz jalǵasyp keledi.
Ádebıet – oıymyzdyń tereńdigi men rýhymyzdyń asqaqtyǵyn aıǵaqtaıtyn uly qazyna. Ony zaman talabyna saı damytý – qalamger qaýymnyń ǵana emes, memleketimizdiń aldynda turǵan mańyzdy mindettiń biri.
Qazir biz ulttyń jańa sapasyn qalyptastyryp jatyrmyz. Ozyq oıly urpaq tárbıeleý isinde zııaly qaýym aıryqsha ról atqarýy kerek. Osy jaýapkershilikti tereń sezinip, adamgershilik qundylyqtardy keńinen dáriptep júrgen barsha qalamgerlerge shynaıy rızashylyǵymdy bildiremin.
Sizderge baq-bereke, tolaıym tabys tileımin!
Halqymyzdyń rýhyn kóterip, tanymyn ulǵaıtatyn týyndylaryńyz kóp bolsyn!», delingen hatta.
