Foto: senate.parlam.kz
Ár kezeńniń júgin arqalap, halyq sanasyndaǵy suranysty dóp basyp otyrǵan basylymnyń jańa úrdister fonynda toqyramaýy mándi mátin, syrly sóz, tereń tanym, baıypty baılam jasaýymen baılanysyp jatqany aqıqat.
«Toı toılaıtyn emes, oı oılaıtyn» kezeńde gazetimiz 105 jyldyq torqaly toıyn mádenı-ıntellektýaldyq formatta atap ótti. Mádenı jıynǵa ár jyldary basylymdy basqarǵan azamattar, halyq qalaýlylary men qoǵam qaıratkerleri, gazet ardagerleri qatysty. Ult múddesin ár kez umyt qaldyrmaǵan ujymdy mártebeli mereıtoımen quttyqtaýshylar legi orasan boldy. Osy qatarda Senat jáne Májilis Tóraǵalary da bar.
Senat spıkeri óz quttyqtaý hatynda dáýirler dúbirinde «Egemen Qazaqstan» san salany damytýǵa mol úles qosqanyn erekshe ekshegen.
«Táýelsizdikti nyǵaıtý, halyqtyń áleýetin arttyrý jáne ulttyq rýhanııatty dáripteý jolynda «Egemen» men egemendikterdiń alar orny erekshe. Qazirgi tańda bas basylym qazaqtyń dúnıetanymyn keńeıtýge, tarıhy men qundylyqtaryn dáripteýge, ádebıeti men mádenıetin, bilimi men ǵylymyn damytýǵa jáne eldiń bereke-birligin saqtaýǵa úlken úles qosyp keledi», dedi Máýlen Áshimbaev quttyqtaýynda.
Májilis tóraǵasy Erlan Qoshanov mereıtoıǵa arnalǵan quttyqtaý hatynda qazaq rýhanııatynyń qarashańyraǵyna aınalǵan basylymnyń talaı tolqyn qalamger, jýrnalıstiń kásibı tolysýyna sep bolǵan sheberhana ekenine nazar aýdarǵan.
«Gazet qabyrǵasynda qazaqtyń qanshama býyn talantty jýrnalısteri eńbek etip, qalyptasty. Qalamdaryn ushtap, sheberlikterin shyńdady. Dáýirdiń tynysyn, qoǵamnyń únin halyqqa shynaıy jetkizdi», delingen Erlan Qoshanovtyń quttyqtaý lebizinde.
Gazettiń osy bıikten tabylýyna ár jyldary qazaqtyń qaımaqtary bilek túre eńbek etti. S.Sádýaqasov, J.Aımaýytov, M.Áýezov, B.Maılın, S.Seıfýllın, T. Rysqulov, O.Jandosov, Ǵ.Músirepov syndy birtýar tulǵalar qolynyń taby tıgen «Egemen Qazaqstan» gazeti bıyl 105 jyldyq mereıtoıǵa sol abyroı bıiginde jetip otyr. Bul týraly Úkimet basshysy Oljas Bektenov gazet ujymyn quttyqtaý hatynda aıryqsha atap ótken.
«Ǵasyrdan astam ýaqyt boıy Alash jurtymen birge jasap, abyz basylymǵa aınalǵan «Egemenniń» orny árdaıym bıik turady. Bútin birneshe dáýirdiń shejiresin boıyna búkken el gazeti otandyq baspasózdi jańa sapalyq deńgeıge kóterip qana qoımaı, tutas ult taǵdyry talqyǵa túsken syndarly sátterde memleket múddesin qorǵaýǵa qyzmet etti. Sondyqtan qaı turǵyda alyp qarasaqta «Egemen Qazaqstan» qazaq baspasóziniń qarashańyraǵy, egemendiktiń etalony deýge ábden laıyqty» ekenin aıtyp Oljas Bektenov «Rýhanııatymyzdyń abyroıyn asqaqtatqan ulaǵatty isterińiz órge bassyn», dep Premer-mınıstr izgi nıetin bildirgen.
«Egemen Qazaqstan» gazetiniń alǵashqy sanynan murat etken múddesi - eldik jol. Sol joldan taımaı tabandy eńbek etip kele jatqan ujymǵa Mádenıet jáne aqparat mınıstri Aıda Balava da arnaıy quttyqtaý hatyn joldady.
«Gazet ujymy oqyrmandaryna jańalyqty jedel, sapaly ári shynaıy túrde jetkizip, jurtshylyq arasynda baıypty nasıhattaýda. Memlekettik múdde men jýrnalıstik bıik talapty teń ustaıtyn basylymnyń kásibı deńgeıi, ustanǵan baǵyty eshqashan ózgergen emes jáne aldaǵy ýaqytta da halqymyzdyń murat-maqsaty men qoǵam damýyna laıyqty úlesterińizdi qosa beresizder dep senemin», delingen Aıda Balaevanyń quttyqtaýynda.
