Foto: Astana qalasy ákimdigi
Elorda ákimi gazet qaı kezeńde de halyqtyń kózi, qulaǵy hám tili qyzmetinen jańylmaı ult múddesi jolynda múdirmeı qyzmet etip kele jatqanyna toqtalǵan.
«Egemenniń aralasýymen sheshilgen ózekti máselelerdiń sanynda shek joq. Basqasyn aıtpaǵanda, osynaý qara shańyraqta eńbek etip, jazýdyń qyr-syryna qanyqqan talaı qalamgerler keıinnen ózi de bir-bir gazet-jýrnaldyń, shyǵarmashylyq ujymnyń tizginin ustap, abyroımen qyzmet etip keledi», dep gazet ujymy aldaǵy ýaqytta da eldiń sózin aıtyp, jurtshylyqty aǵartýmen aınalysa beretinine senim bildirgen.
Al Astana qalalyq máslıhat tóraǵasy Erlan Kanalımov ulttyq ıdeologııa men memlekettik saıasatty nasıhattaý baǵytyndaǵy gazet qyzmetin aıryqsha atap ótken.
«Gazet óz paraqtarynda memleketimizdiń ótkeni men búginin, tarıh taǵlymyn da, jańa zaman talabyn da úılestire otyryp, urpaqtar arasyn baılanystyratyn baǵa jetpes mura. Basylym qoǵamymyzdyń rýhanı azyǵyna aınalyp, jas qalamgerlerdiń shyǵarmashylyǵyn shyńdaıtyn abyroıly alańǵa aınaldy», dep jazdy Erlan Kanalımov ujymǵa joldaǵan quttyqtaý hatynda.
Qazaqstan Respýblıkasy Ulttyq arhıviniń dırektory Saǵıla Nurlanova da bas basylymdy mıereıtoıymen quttyqtaýdan qalys qalmady. Ol keshegi baspasóz kóshin búgingi kúni órge súırep. el shejiresin qaǵazǵa qattaǵan gazettiń ár paraǵy urpaq úshin qundy mura ekenin tilge tıek etken.
«Egemen Qazaqstan» gazeti alǵash ret 1919 jyly «Ushqyn» degen atpen oqyrman nazaryna jol tartqan sátten beri el múddesin qorǵaýdan esh aýytqyǵan emes. Elimizdiń órkendeýi jolynda qalamdaryńyz muqalmaı, qyzmet ete berýlerińizge tilektespin, - delingen quttyqtaý hatta.
Gazet ujymyn «Qazaqstan» respýblıkalyq teleradıokorporasııasynyń Basqarma Tóraǵasy Lázzat Tanysbaı quttyqtap, shyǵarmashylyq tabys tiledi.
