Foto: Oqý-aǵartý mınıstrligi
Túrkistan oblysynyń eki birdeı aýylynda - Eńbek Dıhan men Mankentte jańa mektepter esigin aıqara ashty. Olardyń biri Memleket basshysynyń bastamasymen júzege asyrylǵan «Jaıly mektep» ulttyq jobasy aıasynda salynǵan. Bul mektep 600 oqýshyǵa arnalǵan jáne zamanaýı qaýipsizdik talaptaryna sáıkes keletin barlyq qajetti qural-jabdyqtarmen qamtylǵan. Aıta keteıik, bul Túrkistan oblysyndaǵy ekinshi «Jaıly mektep».
Al elordada eki aýysymda 4 myń oqýshyǵa arnalǵan 11-shi «Jaıly mektep» ashyldy. Bul mektep Úrker turǵyn alabynda ornalasqan, ol oqýshy orny tapshylyǵyn sheshýge septigin tıgizedi. «Jaıly mektep» ulttyq jobasy aıasynda 2026 jylǵa deıin Astanada 24 mektep salynady dep josparlanǵan.
Batys Qazaqstan oblysynyń Oral qalasynda 400 oqýshyǵa arnalǵan jańa mektep paıdalanýǵa berildi. Mektepte balalar shyǵarmashylyǵyn damytý men demalýǵa arnalǵan keńistikter, sondaı-aq jeke shkaftar qarastyrylǵan. Sonymen qatar sport jáne akt zaldary, kitaphana, ashana, sheberhana jáne 36 pándik kabınet bar.
Qostanaı oblysynyń Qostanaı jáne Arqalyq qalalarynda eki jańa memlekettik balabaqsha ashyldy. Bul mektepke deıingi uıymdar barlyq zamanaýı standarttarǵa saı. Olar jatyn bólmelerimen, oıyn bólmelerimen, horeografııalyq, gımnastıkalyq, mýzykalyq jáne sport zaldarymen, pedagog-psıholog, logoped, medısınalyq, qosymsha bilim berý kabınetterimen qamtylǵan.
Aıta keteıik, osy jyldyń basynan beri elimizde 560-tan astam mektepke deıingi uıym ashylǵan.
Elimizdiń tórt óńirinde qosymsha bilim berý nysandary ashyldy. Mysaly, Aqtóbe oblysy Qarǵaly aýdanynyń Badamsha aýylynda óner mektebi ashyldy. Onda 550-ge jýyq bala bilim alyp jatyr.
Qyzylorda oblysynyń Jańaqorǵan aýdanynda eki qosymsha bilim berý uıymy – oqýshylar saraıy men óner mektebi ashyldy. Bul mekemelerde 19 qosymsha bilim berý baǵyty boıynsha 250-den astam bala bilim alady.
Sondaı-aq búgin ǵana Pavlodar oblysynyń Ekibastuz qalasynda Memleket basshysynyń tapsyrmasymen salynǵan «Samǵaý» balalardyń zamanýı shyǵarmashylyq úıi ashyldy. Ol «Balalarǵa qosymsha bilim berý júıesiniń jańa úlgisi» ǵylymı-tehnıkalyq baǵdarlamalary aıasynda 12 baǵyt boıynsha balalardy oqytýǵa arnalǵan joǵary tehnologııalarmen jabdyqtalǵan. Ortalyq kúnine 3000-ǵa deıin balany qabyldaıdy. Onyń ishinde erekshe bilim berýdi qajet etetin oqýshylar da bar.
2024-2025 oqý jylynyń basynan beri elimizde barlyǵy 500-den astam jańa bilim berý uıymdary ashyldy.
