Kollaj: Nursultan Jorabaev
Elimizdiń iri megapolısinde áıelder qaýipsizdigi qanshalyqty baqylaýǵa alynǵan? Bul suraqtyń jaýabyn «Egemen Qazaqstan» gazetiniń tilshisi Aınash Esalı izdep kórdi.
Avtor «Otbasyndaǵy ozbyrlyq: sebebi, saldary, sabaǵy» atty maqalasynda álimjettiktiń taqsiretin tartyp kele jatqandar jetip artylatynyn tilge tıek etken. Máselen, 2024 jyldyń 10 aıynda Almatyda áıelderge qatysty 7705 qylmys tirkelgen, bul kórsetkish ótken jyldyń osy kezeńimen salystyrǵanda 8,1%-ǵa kemigen. Turǵyndar arasynda aqparattyq-túsindirý jumystary júrgizilip, oqý oryndary men uıymdarynda 160 dáris, trenıng men kezdesý ótkizildi. Áıelderdi zorlyq-zombylyqtan qorǵaý jónindegi ınspektorlar 776 áıelge keńes berse, 150 áıel daǵdarys ortalyqtaryna ornalastyrylyp, 9 áıel «Analar úıi» baspanasynan qoldaý tapty.
Almaly aýdandyq polısııa basqarmasynyń áıelderdi zorlyq-zombylyqtan qorǵaý bólimshesiniń aǵa ınspektory, polısııa maıory Aıgerim Qulasbekovanyń aıtýynsha, bıyl otbasylyq-turmystyq zorlyq-zombylyqtyń aldyn alý amaldary edáýir kúsheıtildi. Profılaktıkalyq esepke 6800-den astam adam qoıyldy, 6200-den astam qorǵanys uıǵarymy shyǵaryldy. «Seriktestik – turmystyq zorlyq-zombylyqtyń aldyn alý quraly» jobasy aıasynda 105 ozbyr psıhokorreksııalyq baǵdarlamalarǵa jiberildi.
Eske sala keteıik, osy jyldyń sáýiri aıynan bastap Qazaqstanda úıdegi zorlyq-zombylyq qylmys sanatyna jatqyzyldy, endigi jerde otbasy múshesin uryp-soqqan, densaýlyǵyna jeńil, ortasha, ıakı aýyr zaqym keltirgen adam qylmystyq jaýapkershilikke tartylady.
Maqalanyń tolyq nusqasyn gazetimizdiń №244 (30973) sanynan oqı alasyzdar.
