Byltyr alapat sý tasqyny saldarynan oblysta 4 myńnan astam turǵyn úı, 45 kásipkerlik nysan, 42 avtojol ýchaskesi zaqymdanǵany málim.
Qazir óńirde 8 bóget qalpyna keltirilip jatyr.
Sonyń biri Ýshev kóshesindegi bógette Májilis depýtattary bolyp qaıtty. 1960 jyly paıdalanýǵa berilgen Ýshev kóshesindegi nysan shahardy sý tasqynynan qorǵaýda eleýli ról atqarady.
Bógettiń bıiktigi 4,5 metrden 7 metrge deıin, eni 3 metrden 6 metrge deıin, al uzyndyǵy 300 metrge deıin ulǵaıtylǵan. Búginde nysanǵa 205 myń tonna ınertti materıal jetkizilgen. Bógetti beton plıtalarymen nyǵaıtý júrgizilip jatyr.
«Bul sharalardyń barlyǵy ótken jylǵy jaǵdaıdyń aldyn-alý úshin qolǵa alynyp jatyr. Byltyr tasqynnan kóptegen adam zardap shegip, orasan materıaldyq shyǵyndar oryn aldy. Bıyl buǵan jol berilmeıdi dep senemiz. Osy oraıda bógetti qaıta qalpyna keltirý jumystary qyzý júrgizilip jatqanyna kýá bolyp otyrmyz. Eń bastysy qurylys jumysynyń sapaly ári ýaqytynda aıaqtalýy», dedi depýtat Erkebulan Mámbetov.
Jobanyń jalpy quny 851 mıllıon teńgeni quraıdy. Zamanaýı tehnologııa men sapaly materıaldar qoldanylyp jatyr. Ol bógettiń uzaq merzik qyzmet etýine septigin tıgizedi. Jumystyń sapaly oryndalýy «AMANAT» partııasynyń erekshe baqylaýynda bolady.
