Foto: akorda.kz
Bul týraly jýrnalıst Janbolat Aýpbaev Qalı Sársenbaıǵa bergen suhbatynda bylaı baıandaıdy:
«2004 jyldyń 14 jeltoqsany edi. Prezıdenttiń baspasóz qyzmetindegi jigitterden habar aldyq. Olar elordadaǵy ózderi otyrǵan Ortalyq alańdaǵy ǵımarattan Esildiń sol jaǵasynda salynyp bitken úlken rezıdensııaǵa kóshe bastapty. Jıylyp-terilý 10 kúnge sozylady eken. Al jańa qonystyń saltanatty túrdegi resmı ashylýy 24 jeltoqsanǵa belgilenipti», dep áńgimesin bastaǵan J. Aýpbaev gazet ujymy bul aıtýly iske oraı kóshi-qonǵa jaýapty laýazym ıelerinen suhbat alý usynysymen, sol kezdegi basylym basshysy Saýytbek Abdrahmanovqa kirgenin aıtty. Basshy bul bastamany qup kórip, ıntervıýge sol tustaǵy Prezıdent Keńsesiniń bastyǵy Mahmut Qasymbekovti laıyq kórip otyrǵanyn aıtady. Al suhbat alýshy – Qýat Borash.
Sol kezden úsh kún ótkende daıyn suhbat Saýytbek Abdrahmanovtyń nazaryna qaıta usynylady.
«Bir kún...Eki kún ótti. Habar joq. Mazasyzdanyp, tyqyrshı bastadyq. О́ıtkeni joǵarydaǵy jańalyqty ózge gazetter bizden buryn berip qoıýy múmkin ǵoı. О́stip degbirsizdenip júrgenimizde, Sákeń (Saýytbek Abdrahmanov – red.) ózine shaqyrdy-aý áıteýir».
«Sát salyp qarańyzdarshy... Jańa Astana. Jańa Prezıdent ákimshiligi úıiniń ǵımaraty. Ondaǵy jańa adamdar, jańadan bastalǵan joba. Jumystar. Osyny paıdalanyp: «Jańalyq bolsyn, Almatyda da, Astanada da artymyzdan qalmaı kele jatqan «rezıdensııa» sózin el kópten beri sóz ǵyp júrgen «AQORDA» ataýymen almastyrsaq dep edim. Osyny Mahmutqa aıtqanyma úsh kún boldy. Basynda bul oǵan kelispedi. Sonda oǵan men: «Qaı eldiń de Memleket basshysy qol qoıǵan jarlyq, ókim, qaýlylardyń astynda «rezıdensııa» sózi joq. AQSh-ta máselen «Vashıngton. Aq úı», Reseı Federasııasynda «Máskeý. Kreml», Fransııada «Parıj. Elıseı saraıy» dep jazylady. Al biz nege «Astana. Aqorda» demeske?!», degen ýáj aıttym. Osydan soń ol Prezıdent Apparatynyń basshysy jáne Memlekettik hatshymen sóılese kele búgin: «Kóreıik, degenge keldi. Demek úmit bar. Osy ustanymnan taımaıyq. Eger ol jaqtan bizdiń ıdeıamyzǵa isteıtindeı bir habar, jańalyq bolyp jatsa maǵan aıtyp otyryńyzdar. Buǵan baılanysty barlyq áleýettik resýrsty aıanbaı iske qosýymyz kerek», degen estelikpen sózin jalǵaǵan Janbolat Aýpbaev 24 jeltoqsan, saltanatty jınalystyń ashylýyna oraılastyra qulshyna daıarlanǵan materıal «Arqadaǵy Aqorda – Alashtyń aıbyny» degen atpen jaryq kórgenin aıtady.
Osy saltanatty ashylýda sóz sóılegen el aǵalary da «Bul – elimizdiń Aqordasy!» degendi basa aıtqanyn da tilge tıek etedi.
«Sodan ne kerek, estýimizshe sol kúni keshke Sákeńe (Saýytbek Abdrahmanov – red.) Mahmut habarlasyp: «Eki-úsh kúnde Prezıdent qol qoıǵan jarlyq ne ókim arqyly qýanyshty jańalyq bolyp qalýy múmkin», depti. Al kep kúteıik. Elegizemiz. Alańdaımyz. Joq. Mine 27 jeltoqsan kúni «Shárip Omarovty Chehoslavakııaǵa elshi etip taǵaıyndaý jóninde» bir jarlyq keldi. Biraq ózgeris joq. Mátinniń astynda baıaǵy «Astana. Prezıdent rezıdensııasy» degen jattandy sóılem tur. Odan keıin taǵy bir qujat. Ol da solaı. Al 29 jeltoqsan kúni... Iá, sol kúni keshke!.. «Oralmandardyń 2005-2007 jyldarǵa arnalǵan kóship kelý kvotasy týraly» jarlyqtyń kelgeni... Qaraımyz, ondaǵy mátinniń aıaq jaǵynda «Astana. Aqorda. № 1508» degen jańa sóz tirkesi tur! Mundaı qýanbaspyz», - deıdi Janbolat Aýpbaev. Ol sol sátten Memlekettik mańyzǵa ıe qujattar «Astana. Aqorda» ataýymen shyǵyp, jarııalanyp kele jatqanyn tereń tebirenispen sóz etedi.
Qalı Sársenbaı «Jýrnalıst – ómir barlaýshysy. Jýrnalıstıka – ómir mektebi». «Astana. Aqorda. № 1508» taqyrybymen jaryq kórgen esteliginen úzindi. 90-94 b.
