Foto: Almaty oblysy PD
Memlekettik nagradany marqumnyń ákesine QR Ishki ister mınıstriniń orynbasary Aıdar Saıtbekov Almaty oblysynyń polısııa departamentine jumys saparymen barǵan kezde tabys etti. Ol marqumnyń otbasyna kóńil aıtyp, aǵa leıtenant Baıjomartovtyń erligin, azamattardyń qaýipsizdigin qamtamasyz etýdegi adaldyǵy men úlesin erekshe atap ótti.
«Ishki ister organdarynyń qyzmetkerleri qylmysqa qarsy kúreste jáne tártipti qamtamasyz etý kezinde árdaıym aldyńǵy qatarda. Shalhar Baıjomartov óz ómirin qurban ete otyryp, Otanyna adal qyzmet etkenin dáleldedi», dedi Aıdar Saıtbekov.
Esterińizge sala keteıik, qaıǵyly oqıǵa 2024 jyldyń 20 jeltoqsanynda bolǵan. Jol-kólik oqıǵasyn tirkeý kezinde Toyota Camry kóliginiń júrgizýshisi rólge ıe bola almaı, polısııa qyzmetkerin qyzmettik kóligine qystyryp alǵan. Oqıǵa saldarynan polıseı kóz jumdy.
