Foto: Kólik mınıstrligi
Prezıdent tapsyrmasyna saı júrgizilip otyrǵan jobalar óńirlerdiń ekonomıkasyna serpin berip, týrızmdi túletýge sep bolmaq.
Jańa áýejaı termınaldarynyń salynýy jergilikti halyqty jumyspen qamtyp, sheteldik týrısterdiń qatarynyń qalyńdaýyna múmkindik beredi.
2024 jyly elimizde úsh jańa jolaýshylar termınaly paıdalanýǵa berildi. Máselen, Almaty, Shymkent jáne Qyzylorda qalalarynda jolaýshylar termınalynyń ótkizý qabileti ulǵaıtylǵan.
Almaty qalasy halyqaralyq áýejaıynyń jańa termınalynyń obektini ótkizý qabileti jylyna 2,5 mln-nan 14 mln. jolaýshyǵa deıin ósip otyr. Otandyq avıakompanııalar Air Astana, SCAT, Qazaq Air, Fly Arystan reısteri Qazaqstannyń 19 qalasyna turaqty ushady. Al halyqaralyq áýe qatynasyn álemniń 26 elinde 50 baǵyt boıynsha 30 sheteldik avıakompanııa oryndaıdy.
Shymkent qalasy áýejaıy jańa termınalynyń jylyna 800 myńnan 6 mln. jolaýshyǵa deıin qyzmet kórsete alýǵa qaýqarly. Jańa termınal halyqaralyq áýe marshrýttarynyń sanyn 10-ǵa, reısterdi aptasyna 24-ke deıin arttyrdy. Djıdda, Medına (KSA), Doha (Katar), Fýkýok (Vetnam) jáne Phýketke (Taıland) áýe qatynasy ashyldy.
Qyzylorda qalasynyń «Qorqyt Ata» halyqaralyq áýejaıynyń ótkizý qabileti jylyna 300 myńnan 2 mln. jolaýshyǵa deıin ósti. Búgingi tańda Qyzylorda qalasynan 25 ishki reıs oryndalyp jatyr.
«SKYHANSA» qazaqstan-germandyq kompanııasy «Qorǵas – Shyǵys qaqpasy» arnaıy ekonomıkalyq aımaǵynda qýaty saǵatyna 500 adamǵa deıingi jolaýshylar termınalyn, syıymdylyǵy 550 000 tonnaǵa deıingi otyn qoımasyn, júkterdi 250 000 tonnaǵa deıin tolyq óńdeıtin júk termınalyn salý, áýe kemelerine qyzmet kórsetý avıasııalyq-tehnıkalyq ortalyǵyn qurý boıynsha joba iske asyrylýda. Sondaı-aq 300-den astam turaqty jumys oryndaryn qura otyryp, halyq úshin týrıstik, saýda, oıyn-saýyq qyzmetterin damytý josparlanǵan.
Sońǵy jyldary áýe kóligi jolaýshylar úshin yńǵaıly ári tartymdy bolýda. Mysaly, Qazaqstanda jyl saıyn áýe tasymaly 10-15% artyp keledi. 2024 jyly otandyq avıakompanııalar 15 mıllıonǵa jýyq adamdy tasymaldady, áýejaılar 30 mıllıon jolaýshyǵa, onyń ishinde sheteldik avıakompanııalar men azamattarǵa qyzmet kórsetti. 2024 jyly júk tasymaly kólemi - jylyna 28 myń tonnaǵa ulǵaıǵan.
