Sýret: azattyq-ruhy.kz
О́tken jyly sý tasqyny kezinde múlki men úıi zaqymdanyp, qıraǵan azamattarǵa memleket tarapynan aıtarlyqtaı qoldaý kórsetildi. Qalpyna keltirý jumysynyń nátıjesinde, shamamen 9 myń úı jóndelip, 2 myńnan asa jańa turǵyn úı salyndy. Qosymsha 5 myńnan asa jyljymaıtyn múlik satyp alynǵan.
Senat tóraǵasynyń orynbasary Jaqyp Asanov sý tasqyny elimizge bıyl da qaýip týdyrýy múmkin ekenin atap ótti. Onyń aıtýynsha, kóktemgi sý tasqyny jyl saıyn halyq pen ınfraqurylymǵa zor synaq bolyp otyr. Al ótken jylǵy jaǵdaı tabıǵı apattyń qanshalyqty joıqyn bolýy múmkin ekenin kórsetti.
– О́tken jyl aýyr synaq boldy. Sý tasqynynan myńdaǵan otbasy zardap shekti, úıler qulady, jol men kópir búlindi, áleýmettik jáne kommersııalyq nysandar qırady. Prezıdenttiń aralasýymen jedel sheshim qabyldanyp, barlyq mekemeniń úılesimdi jumysy arqyly shyǵyndar azaıdy, zardap shekkenderge kómek kórsetilip, ınfraqurylym qalpyna keltirildi. Alaıda eger aldyn alý sharalary ýaqtyly jáne tıisti deńgeıde júrgizilse, kóptegen shyǵynnyń aldyn alýǵa bolar edi. Basty mindet tek sý tasqynynyń saldarymen kúresý emes, ony júıeli túrde boldyrmaý kerek, – dedi palata tóraǵasynyń orynbasary.
Al Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Andreı Lýkın sý tasqyny elimiz úshin asa kúrdeli máseleniń biri bolyp qala beretinin atap ótti. Onyń aıtýynsha, ótken jylǵy buryn-sońdy bolmaǵan sý tasqyny ásirese batys jáne soltústik óńirlerdegi júzdegen eldi mekenge qıyndyq týǵyzyp, halyqty biraz ábigerge saldy. Ol bılikti tabıǵı qubylystyń sebebi men saldaryn túsinýge, sondaı-aq aldyn alý jóninde tıimdi sharalar ázirleý ýákiletti organdardyń ortaq mindeti ekenin aıtty.
– Biz Memleket basshysynyń tapsyrmalary qalaı oryndalyp jatqanyn bilý, gıdrotehnıkalyq qurylystar men gıdrometeorologııalyq qyzmetterdiń jaı-kúıin tekserý, sý tasqyny qaýpi joǵary aımaqtarda zańsyz qurylys máselesiniń qalaı sheshilip jatqanyn anyqtaýǵa jınaldyq. Sondaı-aq tótenshe jaǵdaılardy aldyn alýǵa qandaı naqty sharalar qabyldanyp jatqanyn talqylap alýdyń mańyzy zor, – dedi A.Lýkın.
Otyrys barysynda Tótenshe jaǵdaılar mınıstri Shyńǵys Árinov byltyrǵy sý tasqynynyń saldaryna taldaý jasap, kóktemde Qazaqstan sońǵy 80 jylda bolmaǵan aýqymdy sý tasqynyna tap bolǵanyn eske saldy. Bul apat 12 óńirde 12 myńǵa jýyq jeke turǵyn úı men 62 kópqabatty ǵımaratty sý astynda qaldyrdy. Onyń saldaryn joıýǵa qutqarýshylar, áskerıler, polısııa, Ulttyq gvardııa jumyldyrylyp, avıasııa men ınjenerlik tehnıka tartyldy. Nátıjesinde, 35 mln tekshe metrden asa sý sorylyp, ózen arnalarynyń túbin tereńdetý jáne jaǵalaýdy bekitý boıynsha aýqymdy jumystar júrgizildi. Mınıstr ótken jyly bolǵan sý tasqynyn taldaý negizinde bıyl kóktemgi kezeńge belsendi daıyndyq júrgizilip jatqanyn atap ótti.
Sondaı-aq Sý resýrstary jáne ırrıgasııa birinshi vıse-mınıstri Bolat Beknııaz depýtattarǵa yqtımal sý basýdyń aldyn alý jóninde qabyldanyp jatqan tehnıkalyq sharalar týraly baıandady. Sonymen qatar 2024 jyly Qazaqstan-Reseı birlesken jumys toby qurylyp, transshekaralyq sý basseınderindegi gıdrotehnıkalyq qurylystardyń jumysyn úılestirýmen aınalysyp jatqanyn aıtty.
Jedel qabyldanǵan sharalar arqyly sý tasqynynyń saldaryn barynsha azaıtýǵa jáne jańa qaýipterge daıyndyqty kúsheıtýge múmkindik týdy. Depýtattar Úkimet saǵatynyń qorytyndysy boıynsha bıylǵy sý tasqyny kezinde jan-jaqty daıyndyqty jalǵastyrýdy, gıdrotehnıkalyq qurylystardy qarjylandyrýdy arttyrýdy jáne tótenshe jaǵdaılardyń aldyn alýdyń zamanaýı ádisterin engizýdi usyndy.
