Fotolar: Astana qalasynyń Bilim basqarmasynyń baspasóz qyzmeti
Oǵan qatysqan Astananyń Raıymbek batyr atyndaǵy №50 «Qazǵarysh» mektep-lıseıiniń bastaýysh synyp muǵalimi Erjanova Aıgúl Turǵanbaıqyzy 2 altyn medal jeńip alyp, Qazaqstannyń baıraǵyn jelbiretti.
20-ǵa jýyq elden kelgen áıelder arasynan sýyrylyp shyqqan 54 jastaǵy ustaz 100 kg aýyr ziltemirdi kóterip rekordtyq kórsetkishti baǵyndyrdy.
Aıgúl Turǵanbaıqyzy aýyr atletıkamen aınalysýdy bir jarym jyl buryn ǵana bastapty jáne buǵan deıin de birneshe márte álem chempıony atanǵan.
«Meni bastapqyda barlyǵy qytaılyq dep oılady. Alaıda, rekordyq kórsetkish kórsetkenimde Qazaqstannan kelgenimdi bilip qoshemet bildirdi. Adam óziniń jańa qyrlaryn kez kelgen jasta asha alady», deıdi ol.
Memleket basshysynyń qolynan «Qazaqstannyń eńbek sińirgen ustazy» ataǵyn alǵan Aıgúl Turǵanbaıqyzy aldaǵy ýaqytta Afrıkada ótetin jarysqa qatyspaqshy.
