Kezdesý barysynda ekijaqty yntymaqtastyqtyń keń aýqymdy máseleleri talqylandy, atap aıtqanda, eki el arasyndaǵy saıası, ekonomıkalyq, sý-energetıkalyq, tranzıt-kóliktik jáne mádenı-gýmanıtarlyq ózara is-qımyldyń basym baǵyttary qaraldy.
Taraptar dostyq pen ózara qurmet rýhynda strategııalyq seriktestik pen odaqtastyqty odan ári nyǵaıtýǵa kelisti. Sondaı-aq Syrtqy saıası vedomstvolardyń basshylary 2023–2024 jyldary Prezıdent Qasym-Jomart Toqaevtyń Dýshanbege jáne Tájikstan Prezıdenti Emomalı Rahmonnyń Astanaǵa jasaǵan ózara memlekettik saparlary sheńberinde qol jetkizilgen ýaǵdalastyqtardyń iske asyrylý barysyn jiti talqylady.
Saýda-ekonomıkalyq yntymaqtastyqty odan ári keńeıtýge erekshe nazar aýdaryldy. Qazaqstan kóptegen jyl boıy Tájikstannyń iri saýda seriktesteriniń «úshtigine» kiredi. Qabyldanǵan sharalardyń arqasynda ótken jyly ózara saýda kólemi 7,4 paıyzǵa ósip, 1,2 mlrd dollardy qurady. Taraptar taýar aınalymyn 2 mlrd dollarǵa deıin jetkizý jónindegi memleket basshylary qoıǵan maqsatqa qol jetkizý úshin kelisilgen sharalar qabyldaýǵa kelisti.
Aýyl sharýashylyǵy salasyndaǵy ózara tıimdi yntymaqtastyqty jandandyrý da sóz boldy. Onyń úlesi eki eldiń jalpy taýar aınalymynyń 40 paıyzdan astamyn quraıdy. Qazaqstan dástúrli ónimder – bıdaı, un jáne kondıterlik ónimderdiń eksportyn ózara tıimdi túrde arttyrýǵa daıyn. Úshinshi elderge odan ári eksporttaý úshin jemis-kókónis ónimderin qaıta óńdeý boıynsha birlesken kásiporyndar qurý da perspektıvaly baǵyt ekeni aıtyldy.
– Tájikstan – bizdiń Ortalyq Azııadaǵy strategııalyq seriktesimiz jáne naǵyz senimdi odaqtasymyz. Byltyr bıik deńgeıde qol qoıylǵan Odaqtastyq qatynastar týraly shart tarıhı qadam ekeni sózsiz, – dep málimdedi M.Nurtileý.
О́z kezeginde tájik mınıstri elder arasyndaǵy ózara qarym-qatynastyń osyndaı joǵary deńgeıine memleket basshylary arasyndaǵy senimdi ári dostyq dıalogtiń arqasynda qol jetkizilgenin atap ótti.
– Biz Qazaqstanmen qarym-qatynasty joǵary baǵalaımyz jáne saýda-ekonomıkalyq trekke úlken mán beremiz, ony praktıkalyq mazmunmen toltyrý qajet, – dedi S.Mýhrıddın.
Sondaı-aq ǵaryshtyq jáne IT-tehnologııalardy ıgerý, jasandy ıntellekt pen sıfrlandyrýdy damytý salalaryndaǵy ózara is-qımyl keleshegi talqylandy. Atap aıtqanda, eki eldiń mamandary Tájikstan serverlerinde «Internet-resýrstardyń biryńǵaı platformasy» jáne «SmartBridge» júıeleriniń negizgi komponentterin sátti ornalastyrǵan edi. Osy bastamalardy iske asyrý úshin qazirgi ýaqytta 100-den asa tájik mamany Astana-Hub-ta tegin oqyp jatyr.
Mádenı-gýmanıtarlyq yntymaqtastyq ta talqylandy. Memleket basshylarynyń tapsyrmasyna sáıkes keıingi eki jylda Qazaqstan men Tájikstannyń mádenıet kúnderi ótti. Dýshanbede Abaıdyń bıýsti, sondaı-aq Astanada ıbn Sına men Rýdakı eskertkishteri ornatyldy. Joǵary bilim berý salasynda birlesken jobalar tabysty iske asyrylyp keledi. Atap aıtqanda, L.N.Gýmılev atyndaǵy Eýrazııa ulttyq ýnıversıtetiniń qatysýymen M.Osımı atyndaǵy Tájik tehnıkalyq ýnıversıtetinde birlesken aqparattyq tehnologııalar fakýlteti ashyldy.
Kezdesý barysynda mınıstrler óńirlik jáne jahandyq kún tártibindegi ózekti máseleler boıynsha «saǵattardy teńestirip», kópjaqty qurylymdar sheńberinde odan ári tyǵyz yntymaqtasýǵa, eki memlekettiń halyqaralyq bastamalaryn ilgeriletý kezinde ózara qoldaý kórsetýge beıildiligin rastady.
SIM basshylary óńirlik kooperasııany odan ári damytýdyń, Ortalyq Azııadaǵy beıbitshilik pen turaqtylyqty nyǵaıtý jónindegi birlesken kúsh-jigerdiń, onyń ishinde Ortalyq Azııa memleketteri basshylarynyń konsýltatıvtik kezdesýleri, Halyqaralyq Araldy qutqarýdyń qory, AО́SShK, ShYU, TMD, UQShU jáne basqa da halyqaralyq alańdardyń sheńberinde ózara yqpaldasýdyń mańyzdylyǵyn atap ótti.
