Jambyl óńiriniń ónerkásip salasy týraly sóz bolsa, oıymyzǵa birden «Qazfosfat» JShS men «Super Pharm» farmasevtıkalyq zaýyty keletini ras. Sol «Super Pharm» JShS-na qarasty zaýyttyń qasynan boı kótergen «Ersad-2021» kásiporny da birneshe jyl boıy medısına salasyna qajetti buıymdardy úzdiksiz shyǵaryp jatyr. Pandemııa kezinde qurylysy bastalǵan óndiris oshaǵynyń basshylary 2022 jyly jumysty naqty bir jolǵa qoıyp, jylma-jyl ónim kólemin arttyrýǵa basymdyq berdi.
«2022 jyly jumysyn bastaǵan bul kásiporyn munaı ónimderi qaldyqtarynan medısına, qurylys, aýyl sharýashylyǵy jáne avtojol salasyna qoldanylatyn ekologııalyq taza toqyma emes mata materıalyn óndiretin birden-bir zaýyt sanalady. Kásiporyn basshylary jyl ótken saıyn ónim kólemin arttyryp jatyr.
Zaýyt ujymy byltyr 308,2 tonna ıaǵnı, 278,3 mln teńgeniń ónimin óndirdi. О́ndiris oshaǵy ashylǵaly beri memlekettik bıýdjetke 99 mıllıon teńgeden astam salyq tóledi. Bul kásiporyn basshylyǵy men jumysshylardyń eseli eńbeginiń arqasynda múmkin bolyp otyr», deıdi Jambyl aýdany kásipkerlik jáne ónerkásip bóliminiń basshysy Qýat Oshaqbaı.
Birneshe jyl buryn jańa zaýyttyń ashylý saltanatynda sóz alǵan «Super Pharm» JShS quryltaıshysy Qaırat Qaımoldaev kásiporyn jumysyn júıeleýge sol kezdegi pandemııanyń aıtarlyqtaı áser etkenin aıtqan edi. Qysyltaıań shaqta jańa isti qolǵa alǵan seriktestik basshysy birinshi kezekte shıkizatqa degen táýeldilikti joıýdy maqsat tutqan.
«Endi biz óndiriske qajetti shıkizat úshin kórshiles memleketterge táýeldi bolmaımyz. Ýaqytynda aıtarlyqtaı qıyndyqtarmen betpe-bet kelgenimiz ras. Onyń nesin jasyramyz? Shıkizat jetedi degenshe ýaqyttan utyldyq. Jolymyzdy bógegen máseleler boldy. Sol ýaqytta qajetti qurylǵylardy satyp alyp, edel-jedel iske kiristik. Máselen, jol qurylysynda betonnyń astyna salynatyn matany óndirýdi oılastyrdyq. Sondaı-aq jıhazdy qaptaıtyn matalardy óndirý jaǵyn da qarastyrdyq. Al medısınaǵa qajetti buıymdar ilgeriden beri óndiriledi ǵoı», deıdi Q. Qaımoldaev.
Qýat Oshaqbaı keltirgen málimetke súıensek, «Ersad -2021» kásiporny medısına salasynda bir ret qoldanylatyn (spanbod) toqyma emes mata óndiredi. О́nim juqa polımerli jipten jasalatyn kórinedi. Sonysymen sapaly desedi.
«Joǵaryda aıtylǵan materıaldan medısına salasyna qajetti arnaıy birrettik kıim tigiledi. Budan bólek, aıaqkıim, medısına qyzmetkerlerine arnalǵan qalpaqtar men halattar, betperde, tóseme óndiriletinin aıta ketken jón shyǵar.
Jalpy alǵanda, zaýyt qyzmetkerleri shyǵaratyn ónimderdi sala mamandary sapa turǵysynan joǵary baǵalaǵan. Túrli tásilder arqyly jasalatyn buıymdardyń zalalsyzdandyrý qabileti joǵary desedi. Sýdy der kezinde qaıtarady eken. Sonymen qatar aýanyń ótýine múmkindik týdyrady», deıdi Jambyl aýdandyq kásipkerlik jáne ónerkásip bóliminiń basshysy Q.Oshaqbaı.
Resmı derekke júginsek, «Ersad-2021» zaýytynda qazirgi kezde 25 adam turaqty jumyspen qamtylǵan. Olardyń ortasha jalaqysy – 300 myń teńge. Sondaı-aq kásiporyn basshylary jumysshylardy ystyq tamaqpen qamtý, olardy arnaıy qoǵamdyq kólikpen tasý jumysyn jolǵa qoıǵan. Bir sózben aıtqanda, zaýyt qyzmetkerleriniń alańsyz eńbek etýine barlyq jaǵdaı qarastyrylǵan.
Joǵaryda aıtqanymyzdaı, kásiporyn óndiretin ónim kólemi jyl ótken saıyn artyp keledi. Zaýyt basshylyǵy birinshi kezekte ishki naryqty qamtamasyz etýge basymdyq berip otyr. Olar keltirgen derekke sensek, óndirilgen ónimdi negizinen Shymkent, Almaty, Taraz sekildi ózge de birneshe qaladaǵy mekemeler tutynady.
Jambyl oblysy,
Jambyl aýdany,
Aısha bıbi aýyly
