Foto: Úkimettiń baspasóz qyzmeti
Jabdyqtardy jóndeý jáne qalpyna keltirý boıynsha aıtarlyqtaı jumystar júrgizilgen Petropavl 2-JEO-ǵa erekshe nazar aýdaryldy. «SevKazEnergo» AQ bas dırektory qazandyq agregattary men týrbogeneratorlar sııaqty negizgi tehnıkalyq quraldardyń tozý deńgeıi 57,3%-dy quraıtynyn baıandady. 2024 jyly 2-JEO-da №1, 9 qazandyqtary men №3, 6 týrbınalaryna kúrdeli jóndeý júrgizilip, sondaı-aq tórt týrbınany jóndeý jumystary aıaqtalǵan.
Sonymen qatar bıiktigi 180 metr №1 tútin murjasynyń qurylysy aıaqtaldy, ony paıdalanýǵa berý jyl sońyna josparlanǵan. Sondaı-aq №3, 6, 11 úsh qazandyqta jáne №7 bir týrbınada qalpyna keltirý jumystary jalǵasyp jatyr.
Kásiporyn basshylyǵynyń aqparatyna sáıkes, 2-JEO kómir jáne mazýtpen tolyq qamtamasyz etilgen. Qazirgi ýaqytta qorda 183 myń tonna kómir, 1833 tonna mazýt bar. Otyn jetkizý kestege sáıkes júzege asyrylady.
Jylý elektr ortalyqtarynda ýaqtyly júrgizilgen daıyndyq pen qalpyna keltirý jumystary qalanyń jylýmen qamtý jabdyqtary men júıeleriniń turaqty jumysyn qamtamasyz etýge múmkindik berdi. Bıylǵy jylytý maýsymy shtattyq rejımde ótip jatyr. QR Energetıka mınıstrligi bıyl nysandy qaýiptiń «qyzyl» aımaǵynan «sary» aımaqqa shyǵarýdy josparlaǵan.
Kásiporynda Premer-mınıstrge «Energetıkalyq jáne kommýnaldyq sektorlardy jańǵyrtý» ulttyq jobasynyń iske asyrylý barysy týraly baıandaldy. Búginde Soltústik Qazaqstan oblysynda 363 medısınalyq mekemeni, 585 oqý ornyn, 156 mádenıet jáne sport nysanyn, sondaı-aq 1435 kóppáterli turǵyn úıdi jylýmen qamtamasyz etetin 490 qazandyq jumys isteıdi.
«Jylýmen úzdiksiz qamtamasyz etý jumysy Memleket basshysynyń erekshe baqylaýynda. Sońǵy bir jylda elimizdegi 55 jylý kózi jańǵyrtyldy. Úkimet osy baǵytta energetıkalyq jáne kommýnaldyq sektorlardy jańǵyrtý jónindegi ulttyq jobany iske asyryp jatyr. Júrgizilgen jumystardyń nátıjesi boıynsha ınjenerlik jelilerdiń tozý deńgeıi 40%-ǵa deıin tómendep, elektr energııasyn óndirý qýaty 7,3 GVt-qa artady dep boljanýda. Sonymen qatar jobalar 3,5 myń jumys ornyn ashýdy kózdeıdi», dedi Premer-mınıstr.
