Atalǵan is-sharaǵa BUU-nyń, dıplomatııalyq korpýstyń, memlekettik organdardyń, ǵylymı toptardyń ókilderi qatysty. Uıymdastyrýshylardyń aıtýynsha, bul talqylaý negizinen 2024 jyly ótken Bolashaq sammıtiniń qorytyndy qujattarynda, onyń ishinde bolashaq Paktinde, Jahandyq sıfrlyq shartta jáne Bolashaq urpaqtar týraly deklarasııada bekitilgen mindettemelerdi iske asyrýda mańyzdy qadam boldy. О́ıtkeni mundaı bastamalar jahandyq yntymaqtastyqty nyǵaıtýǵa jáne qazirgi syn-qaterlerdi sheshýde BUU qyzmetiniń tıimdiligin arttyrýǵa baǵyttalǵan.
«Qazirgi zamanǵy jahandyq syn-qaterler jaǵdaıynda halyqaralyq yntymaqtastyq turaqtylyq pen ornyqty damýdy qamtamasyz etýdiń negizgi quraly bolyp qala beredi. Qazaqstan beıbitshilik pen turaqtylyqty ilgeriletýdegi kóshbasshylyǵyn dáıekti túrde kórsetip keledi. Al qazirgi pikirtalas bolashaqtyń ortaq kórinisin qalyptastyrýǵa múmkindik beredi. Jahandyq problemalar jahandyq sheshimderdi talap etedi. Bıyl eldiń ulttyq erekshelikterin eskerip jáne ortaq maqsattarǵa jetý úshin ujymdyq jaýapkershilikti nyǵaıta otyryp, transformasııalyq ózgeristerdi jedeldetýge múmkindik beretin bolashaq úshin Paktini iske asyrýǵa den qoıdyq», dedi BUU-nyń Qazaqstandaǵy Turaqty úılestirýshisiniń mindetin atqarýshy Stıven O'Mallı.
«Bolashaq úshin paktiniń» qorytyndy qujaty Nıý-Iorkte BUU-nyń Bolashaq Bas Assambleıasynyń sammıtinde maquldandy. Qujat daýys berýsiz, konsensýspen qabyldandy. 42-paraqty «Bolashaq úshin paktinde» jahandyq problemalar, sonyń ishinde áskerı qaqtyǵystar men BUU men jahandyq ınstıtýttardy reformalaý jónindegi elderdiń usynystary qamtylǵan. Onda «Turaqty damý jáne damýdy qarjylandyrý»; «Halyqaralyq beıbitshilik jáne qaýipsizdik»; «Ǵylym, tehnologııa, ınnovasııa jáne sıfrlyq yntymaqtastyq»; «Jastar jáne bolashaq urpaq» sekildi bólimder bar. Al Bolashaq urpaq týraly deklarasııa jastardy ulttyq jáne halyqaralyq deńgeıde sheshim qabyldaý úderisine tartýdy kózdeıdi. Buǵan jaqynda qurylǵan BUU Jastar bıýrosy yqpal etedi. Sondaı-aq Jahandyq sandyq shart jastar arasynda sıfrlyq saýattylyqty damytýǵa, ınnovasııalar men kásipkerlikti qoldaýǵa baǵyttalǵan. Osy bastamalardy tıimdi iske asyrýǵa Sıfrlyq jáne ozyq tehnologııalar jónindegi BUU bıýrosy quryldy. Ol sıfrlyq transformasııa úderisinde memleketterdiń kúsh-jigerin úılestiredi.
Al Prezıdent ortalyǵynyń dırektory Baqytjan Temirbolat qazirgi zamanǵy problemalardyń kópjosparly sıpaty álemdik qoǵamdastyqty turaqty damýǵa qol jetkizý, bolashaq urpaqtyń ıgiligi múddesinde álemdegi jalpy qaýipsizdik pen ádilet deńgeıin arttyrý úshin birlesip jańa sheshimder izdeýge májbúrleıtinin aıtty.
«Mundaı jaǵdaıda kópjaqty kúsh-jigerge, eń aldymen bıyl 80 jyldyǵyn atap ótetin BUU formatyna erekshe úmit artylady. Qazaqstan óz tarapynan BUU qyzmetin tolyq qoldaı otyryp, onyń Qaýipsizdik keńesindegi orta derjavalar men barlyq damýshy eldiń rólin kúsheıtýdiń mańyzdylyǵyn málimdeıdi. Bul – Prezıdent Qasym-Jomart Toqaevtyń ustanymy», dedi ol.
Sonymen qatar qatysýshylar klımattyń ózgerýi, sıfrlyq basqarý jáne jahandyq qaýipsizdik sııaqty ózekti máselelerdiń sheshimi de halyqaralyq yntymaqtastyqta jatqanyn aıtady. Negizi elimiz 1992 jyly BUU-ǵa kirgennen beri ıadrolyq qarýsyzdaný, aımaqtyq qaýipsizdik pen turaqty damýdyń belsendi qoldaýshysy bolyp keledi. Bul is-shara elimizdiń BUU jumysyna qosqan úlesi men odan ári ózara is-qımyl bolashaǵyn talqylaý alańyna aınaldy.
«Ekonomıkalyq daǵdarystar, pandemııa, óńirlik qaqtyǵystar jáne ıgilikter men baılyqtyń ádiletsiz bólinýi sııaqty syn-qaterlerge qaramastan, kópjaqty tásil – burynǵysynsha halyqaralyq qoǵamdastyqtaǵy yqtımal bytyrańqylyqqa qarsy kúshti qural. Sondyqtan Prezıdent Qasym-Jomart Toqaev «Birikken Ulttar Uıymy jahandyq yntymaqtastyq pen progrestiń irgetasy qyzmetin atqaratyn balamasy joq jalǵyz ámbebap qurylym bolyp qala beretinin» atap ótti», dedi Syrtqy ister mınıstriniń birinshi orynbasary Aqan Rahmetýllın.
Sondaı-aq is-sharada Brazılııanyń Qazaqstandaǵy elshisi Marsel Fortýna Bıato, Túrkııanyń Qazaqstandaǵy elshisi Mustafa Kapýdjý, «Qoǵamdyq pikir» zertteý ınstıtýtynyń dırektory Botagóz Raqysheva, Prezıdent janyndaǵy QSZI Halyqaralyq qaýipsizdik bóliminiń basshysy Dáýren Áben de elimizdiń BUU-ǵa músheligi men onyń kópjaqtylyqqa qosqan úlesin atap ótti.
