Foto: baq.kz
Bul karta shetelde turatyn qandastarymyzdyń elimizge kirip-shyǵý máselesin jeńildetedi. Osy ýaqyt aralyǵynda ózge eldiń azamattyǵy bar etnıkalyq qazaqtarǵa 65 karta berilgen. Atalǵan karta 10 jylǵa jaramdy.
Byltyr Aqmola oblysy boıynsha 853 otbasyna qandas mártebesi berildi. Sonyń 554-i Qytaıdan qonys aýdarǵan. Al óńirlik kvotaǵa kelsek, ótken jyly 535 qandas qabyldandy. Qandastarǵa memleket tarapynan jasalyp jatqan qoldaý da zor.
«О́tken jyly 510 qandasqa nemese 176 otbasyna 133 mıllıon teńge kóleminde qarajat tólendi. Turǵyn úı jaldaý jáne kommýnaldyq qyzmetterge aqy tóleý boıynsha shyǵystardy óteý úshin 20 otbasyna 8 mıllıon teńge bólindi. Ekonomıkalyq utqyrlyq sertıfıkatyna 390 mıllıon teńge qarastyryldy. Bıyl jospar boıynsha 285 adamǵa qandastardy qabyldaýdyń óńirlik kvotasy bólinip otyr. Olardyń kóship-qonýyna 32 mıllıon teńge sýbsıdııa qarastyrylǵan. Bastapqyda 30 otbasyna turǵyn úı jaldaý jáne kommýnaldyq qyzmetterge aqy tóleý boıynsha shyǵystardy óteýge 15,7 mıllıon teńge bólý kózdelip otyr. 76 adamǵa ekonomıkalyq utqyrlyq sertıfıkaty berilmek. Oǵan 360 mıllıon teńge qarastyrylǵan», deıdi oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Sholpan Rahmatýllına.
О́tken jyly Qytaı Halyq Respýblıkasynan Qosshy qalasyna kelgen Qahan Mamıla qonaq úı salý maqsatynda kásipker retinde «Ata Joly» kartasyn alǵan. Al tarıhı otanyna 2023 jyly qazannyń 10-da kelgen Qoıshy Komonos memleket tarapynan kórsetilgen kómekke rıza ekenin aıtady.
«Kvota aldyq, basymyzǵa baspana berdi. Bir úıde bes jan turamyz. Nemerem áli kishkentaı. Eki balam jumysta. О́zimiz zeınetkermiz», deıdi ol.
Erejege sáıkes karta úsh sanattaǵy shetelde turatyn etnıkalyq qazaqtar úshin beriledi. Úmitker Qazaqstanda talap etiletin kásipterge saı mamandyqqa ıe bolýy qajet. «Ata joly» kartasyn usynýǵa ótinishti «Qutty meken» mobıldi qosymshasy nemese migration.enbek.kz kóshi-qon resýrstary portaly arqyly berýge bolady.
