«Men qazaqtardyń salt-dástúrleri týraly ár kez aıtyp júremin. Kóptegen qonaqjaı adamdy kórdim, biraq olar – meniń týǵan jerimdegideı qonaqjaı emes. Meniń qalam – Selınograd, Aqmola, Astana, aty qansha aýyssa da osy qonaqjaı qalpynan tanbady. Mundaıdy esh jerden kórgen emespin. Bárimiz bilemiz, meıman kelse, ol jaıdan-jaı ketpeıdi. Onyń tamaǵy toq bolady, úı ıesiniń jıǵan-tergeni, saqtaǵany, barlyǵy qonaq aldyna aq dastarqan bolyp jaıylady. Al dastarqan basyndaǵy kóńil kúı qandaı, ony esh jerden tappaısyń, áńgime-dúken bir-birine uqsamaıdy. Ár qazaqtan qashanda qonaqjaılylyq, dostyq nıetti kórýge bolady. Muny týǵanymnan kórip kele jatsam da, tańǵalýmen kelemin, ne degen darqan kóńildi halyq», dep aǵynan jaryldy elordadaǵy «Rýsskaıa obshına» qoǵamdyq birlestiginiń basshysy Andreı Avdeev.
Sondaı-aq ol elimizde oryn alǵan reformalarǵa toqtalyp, qoldaıtynyn da jetkizdi, ásirese qazaq tiliniń bolashaǵy zor ekenin aıtyp, senim bildirdi.
«Menen qazaq tilin bilesiz be, sóıleısiz be dep jıi suraıdy. Birinshi mamandyǵym – orys tili pániniń muǵalimi, odan soń ınjener mamandyǵyn ıgerdim. Jasyratyny joq, mektepte qazaq tilin mardymdy oqytpady. Alaıda oǵan qarap qol qýsyryp otyrýǵa bolmaıdy, árıne. Qazaqstanda memlekettik til qazaq tiliniń mártebesi bıik, qoldanylý aıasy keń bolýy kerek. Zańdy turǵydan alǵanda da ústemi bıik bolýy shart. Biz osyǵan jetip kelemiz, jettik deýge de bolady», dep pikirin bildirdi keıipkerimiz.
Aqmola oblysynda ósip-óngen, 30 jyldan asa ýaqyt eńbek etip kele jatqan ol Qazaqstan Otanym bolyp qala bermek, endi eshqaıda qozǵalǵysy kelmeıtinin, ásirese Astanadan ketpeıtinin aıtty. О́ıtkeni Astananyń qalyptasý tarıhyna kýá bolǵandardyń biri. Otbasyn quryp, úsh balasy dúnıege kelgen jerinen jyraqta júrgenin tipti elestete de almaıdy. Aıtýyna qaraǵanda, balalary da týǵan jerlerinen ketkisi joq.
О́zi basqaryp otyrǵan «Rýsskaıa obshına» qoǵamdyq birlestiginiń qyzmeti de, jetistigi de zor eken. 2013 jyly qurylǵan birlestikte tek orystar emes, ózge etnos ókilderi de bar. Olardyń barlyǵy Dostyq úıinde qazaq tilinde ótetin «Mámile» suhbat klýbynyń kezdesýlerine qatysady. Atalǵan klýbqa memlekettik tildi meńgerýge nıet bildirgender jınalady.
Jalpy, «Rýsskaıa obshınanyń» ókilderi erikti túrde qalanyń mádenı damýyna úles qosyp keledi. Birlestik janynan qurylǵan ansambl bar. Sondaı-aq birlestik ókilderi elordadaǵy ýnıversıtetterdiń birinde qurylǵan stýdenttik assambleıanyń múshelerine keńes berip, jastardy qoldap, olarmen birneshe mádenı is-shara ótkizgen. Osylaı qoǵam ómirine aralasyp, belsendilik tanytqany úshin Prezıdent Qasym-Jomart Toqaevtyń Alǵyshatyna ıe bolǵan. A.Avdeevtiń aıtýynsha, birlestik ókilderinen eshqandaı jarna alynbaıdy. Ony ózi basshylyqqa kelgende aldyryp tastapty.
«Elimiz etnosaralyq qarym-qatynas máselelerin tıimdi sheship jatyr dep senimmen aıta alamyz. Men muny Qazaqstan halqy Assambleıasynda qyzmet etetin adamnyń kózqarasymen aıtyp otyrmyn. Bizdiń qurǵan model biregeı, qoǵam erekshe. Osyny baǵalaýymyz kerek», dedi «Rýsskaıa obshına» basshysy.
