Foto: Aqorda
«Qymbatty hanymdar, Sizder, álemge ádemilik pen úılesim, shańyraqqa jylylyq pen jaılylyq syılap kelesizder. Sizderge óskeleń urpaqty tárbıeleý, otbasylyq qundylyqtardy ilgeriletý sekildi aıryqsha jaýapkershilik júktelgen. Barlyq salada adal eńbek etip, tabandy da tıimdi jumystaryńyzben memleketimizdiń áleýeti men bedelin nyǵaıtyp júrsizder. Analary alańsyz qoǵamda balalar da baqytty ómir súredi. Ana men balanyń jaǵdaıy durys bolsa, áleýmettiń jaǵdaıy da durys bolady. Sondyqtan bolashaǵyn oılaǵan el, eń aldymen, áıelderdiń jaǵdaıyn jaqsartýdy oılaıdy», dedi Memleket basshysy.
Memleket basshysy memlekettiń áıelderdi barynsha qorǵaýǵa jáne jan-jaqty qoldaýǵa basa mán beretinin atap ótti.
«Memleketimiz áıelderdi barynsha qorǵaýǵa jáne jan-jaqty qoldaýǵa basa mán beredi. Osy baǵytta naqty jumystar atqarylyp jatyr. Meniń tapsyrmammen otbasy ınstıtýtyn nyǵaıtýdy kózdeıtin mańyzdy sharalar qabyldandy. Barlyq aımaqta qıyn jaǵdaıǵa tap bolǵan otbasylarǵa qoldaý kórsetetin ortalyqtar ashylyp jatyr. Kóp balaly analardy qoldaýdyń ulttyq modeli qalyptasty. Sonyń arqasynda jyl ótken saıyn kóp balaly otbasylardyń sany artyp keledi», dedi Prezıdent.
