Syrtqy saıası vedomstvosynyń basshysy kezdesýdi asha otyryp, oı tolǵaýdy, birlikti jáne ıgi isterdi beıneleıtin qasıetti Ramazan aıynyń rýhanı mańyzdylyǵyn atap ótti.
«Ramazan – oraza aıy ǵana emes, rýhanı qundylyqtardy nyǵaıtý, ózara syılastyq pen yntymaqtastyq ýaqyty. Qazaqstan árqashan beıbitshilikti, tatý kórshilikti jáne halyqaralyq yntymaqtastyqty jaqtap keledi jáne bul qaǵıdattar ózgermeıdi», dep málimdedi mınıstr óz sózinde.
M.Nurtileý jahandyq syn-qaterlerge qaramastan elimiz beıbitshilik pen turaqtylyqty qoldaýǵa baǵyttalǵan syndarly syrtqy saıasatty júrgizýdi jalǵastyryp jatqanyn jetkizdi. Ol 2024 jylǵy elimizdiń musylman eldermen yntymaqtastyǵyn qorytyndylap, 2025 jylǵa arnalǵan ózara is-qımyldyń basym baǵyttaryn belgiledi.
Sońǵy jyldary Qazaqstan saýda-ekonomıkalyq seriktestikti, kólik logıstıkasyn jáne gýmanıtarlyq yntymaqtastyqty damyta otyryp, musylman álemimen baılanystardy aıtarlyqtaı nyǵaıtqany atalyp ótti. Bul kúsh-jiger barlyq taraptar úshin jańa perspektıvalar ashyp, eleýli nátıje berip keledi.
SIM basshysy ekijaqty jáne kópjaqty baılanystardy damytýǵa belsendi qatysqany úshin dıplomatııalyq korpýsqa alǵysyn bildirip, Qazaqstannyń Almatyda Ortalyq Azııa men Aýǵanstan úshin Ornyqty damý maqsattary boıynsha BUU О́ńirlik ortalyǵyn qurý jónindegi bastamasyna qoldaý bildirgenine erekshe nazar aýdardy.
Sheteldik dıplomattar jyly qabyldaý úshin alǵys aıtyp, Qazaqstanmen seriktestikti odan ári nyǵaıtýǵa yntaly ekenderin jetkizdi.
