Kollajdy jasaǵan – Amangeldi Qııas, «EQ»
QNRDA atap ótkendeı, qaryz onlaın rásimdelgen jaǵdaıda nesıe bıýrosynan nemese «elektrondyq úkimet» veb-portalynan kelisim alýǵa bolady.
Byltyr Májilis depýtaty Magerram Magerramov azamattardyń kıberqylmysqa qarsy is júzinde álsiz ekenin málimdep, osy oraıda onlaın-nesıeleýge tyıym salýdy usynǵan bolatyn. Qarjy taldaýshysy Iýrıı Masanovtyń aıtýynsha, onlaın-nesıe alýǵa tyıym salmaı, qarjylyq saýattylyqty arttyrýǵa mán berý kerek.
«Bankterdiń ózderi kúdikti tranzaksııalardy eseptep, alaıaqtardyń atyna aqsha aýdarýdy toqtatady, alaıaqtardyń atyna aqsha aýdaratyn bank kartalaryn buǵattaıdy. Alaıaqtardyń yqpalyna túsý qaýpin azaıtý úshin halyqtyń qarjylyq saýattylyǵymen kóbirek jumys istegen jón. Onlaın-nesıelendirýdi jabý – alaıaqtar tarapynan jeńisti moıyndaý jáne adamdar shaǵyn nesıe nemese bólip-bólip tóleý úshin bank bólimshelerine nemese turmystyq tehnıka dúkenderine barýǵa májbúr bolǵan 2000 jyldarǵa qaıta oralý», deıdi.
Sarapshy Maqsat Halyqtyń aıtýynsha, eldegi eń iri bankterdiń ózi onlaın alaıaqtar úshin qoljetimdi. Sol sebepti, tek jekelegen bankter emes, Qazaqstan qarjygerleri qaýymdastyǵy nemese Ulttyq bank bazasynda ortaq kıberqaýipsizdik ortalyǵyn ashatyn kez keldi.
«Bankter jeke-dara bul másele aldynda qorǵansyz ekenin kórip júrmiz. Tehnologııa damyǵan saıyn onyń álsiz tusyn urymtal jerden soǵatyn kıbershabýyl tehnologııasynyń múmkindigi de ártaraptandyrylyp barady. QNRDA-nyń birinshi kezekte kámelet jasyna jetpegender men zeınet jasyndaǵy azamattarǵa nesıe alýdyń dástúrli túrin usynýy kóńilge qonymdy. Menińshe, osy topqa qatysty sheshim 2000 jyldarǵa keri oralýdy bildirmeıdi. Tyıym salýdyń ornyna ol sıfrlandyrý úderisin buzbaı, azamattardy qorǵaı alatyn retteý sharalaryn engizýdi usynady. Alaıaqtardyń áreketteri úshin bankterdiń ortaq jaýapkershiligin zańmen naqtylasaq, bankterdiń urlanǵan qarajat úshin jaýapkershiligi de zańdastyrylady. Bankterdiń jaýapkershiligi zańdastyrylsa, bank qaýipsizdik jaǵyna kóbirek kóńil bóler edi», deıdi Maqsat Halyq.
Aıta ketý kerek, Birinshi kredıttik bıýro jaqynda jańa qyzmet – qońyraý shalý arqyly nesıe berýge tyıym salatyn tetiktiń paıda bolǵanyn habarlady.
