Foto: Aqorda
«Eń aldymen búgin Amal kúni barshańyzǵa qutty bolsyn degim keledi. Qystan aman-esen shyǵyp, aǵaıyn-baýyrmen kórisý – ejelden kele jatqan ata dástúrimiz. Bul kún – Áz-Naýryzdyń bastaýy. Elimizdiń tól merekesi bıyl da qasıetti Oraza aıyna oraılas kelip otyr. Qasterli meıramdarymyz halqymyzdy ıgi amaldar jasaýǵa úndeıdi. Asyl qasıetterimizdi keńinen dáripteıdi. Quryltaıdyń ulyq merekelermen qatar ótip jatqany – jaqsylyqtyń nyshany», dedi Prezıdent.
Sondaı-aq, Memleket basshysy birneshe jyl buryn alǵash ret Ulttyq quryltaı týraly bastama kótergeni týraly toqtaldy.
«Osydan úsh jyl buryn naýryz aıynda arnaıy Joldaý jarııaladym, ony bilesizder. Elimizdi túbegeıli jańǵyrtý úshin aýqymdy reforma jasaıtynymyzdy aıttym. Sol kezde alǵash ret Ulttyq quryltaı týraly bastama kóterdim. Úsh jyldyń ishinde Qazaqstan jańa turpatty el boldy. Saıası reformalar jan-jaqty ózgerister jasaýǵa múmkindik berdi. Jalpyhalyqtyq referendým arqyly Ata zańǵa túzetýler engizildi. Parlamenttiń quzyry keńeıdi, Úkimettiń jaýapkershiligi artty. Adam quqyqtaryn qorǵaý júıesi jaqsardy. Konstıtýsııalyq sot quryldy. Sheshim qabyldaý úderisine azamattardyń belsene qatysýyna jol ashyldy. Basqa da baǵyttarda mańyzdy reformalar jasaldy», dedi Qasym-Jomart Toqaev.
