16-shy jup Aıdos Amandyq pen Aıdana Bolattyń nekelerin qııý rásimine qazaq qyzdarynyń sulýlyq etalonyna aınalǵan Qyz Jibegi, Qazaq KSR Eńbek sińirgen artısi, «Qurmet», «Parasat» ordenderiniń ıegeri Merýert О́tekesheva, Qazaqstannyń eńbek sińirgen qaıratkerleri Qanat pen Sveta Aıtbaevtar jáne elordadaǵy Yryskeldi qajy meshitiniń bas ımamy, belgili dintanýshy-ǵalym Nurlan Baıjigituly qatysty.
«Teatrymyz ashylǵaly tórt jyl jarymdaı ýaqyt boldy. Osy aralyqta tek spektaklderdi sahnalaý ǵana emes, bizdiń teatrymyz úlken shańyraqqa aınaldy. Teatrda tek qana 15 otbasy emes, 30 adam bir-birimen úılesip, shańyraq kóterdi. Bizdiń ujymymyzda byltyrdan bastap erekshe Naýryznama bastalyp jatyr. Nekelesken jastardyń juptary eshqashan jazylmasyn!», dedi atalǵan teatr dırektory, Qazaqstannyń eńbek sińirgen qaıratkeri Ashat Maksımuly.
Shara barysynda neke qııý rásimimen qatar án shyrqalyp, kúı tartyldy. Jas otbasyǵa bata berilip, tilekter aıtyldy. Otbasylyq qundylyqtar dáripteldi.
Yryskeldi qajy meshitiniń bas ımamy, belgili dintanýshy-ǵalym Nurlan Baıjigituly juptasqan jastarǵa batasyn berip, musylmansha neke qııý rásimin jasady.
Mártebeli qonaqtar jastarǵa júrekjardy lebizderin bildirip, el men jurttyń tek alǵystaryn alýyn, ómir jolynda aspandary ashyq bolýyn tiledi.
Al, shańyraq kóterip jatqan Aıdos Amandyqtyń aıtýynsha, Naýryz merekesiniń jańa tujyrymdamasy aıasyndaǵy «Shańyraq kúni» jalpyulttyq otbasylyq qundylyqtar men kirshiksiz mahabbat kúnine aınalady deýge negiz bar.
«Búgin nekemizdi kıeli sahnada Shańyraq kúninde qıyp jatyrmyz. Biz teatrda tabysqan 16-shy juppyz. Bul biz úshin eki ese baqyt. Aldymyzda úılengen aǵa-ápkelerimiz qazir úbirli-shúbirli, berekesi men birligi jarasqan jarasymdy otbasyǵa aınalyp otyr. Aldaǵy ýaqytta da osy ıgi dástúr jalǵasady dep oılaımyz», dedi ol.
