Foto: freepik
Búgin bir mezette elordadaǵy 111 mektepte synyp saǵattary ótip, 200 myńǵa jýyq oqýshy elimizdiń sý resýrstary jáne ony únemdep paıdalaný týraly aqparatpen tanysty.
Osy mazmundaǵy bas qosýǵa sala mınıstri Nurjan Nurjigitov qatysty.
Mınıstr №104 mekteptiń oqýshylaryna elimizde sý resýrstaryn únemdeý jáne ony tıimdi paıdalaný boıynsha vedomstvonyń atqaryp jatqan jumysy týraly aıtyp berdi. Mınıstrlik 2024-2026 jyldarǵa arnalǵan sý únemdeýdiń Jol kartasyn ázirledi. Qujat sý zańnamasyn jetildirý, sý salasyn sıfrlandyrý, sýdy esepke alý men sý únemdeýdiń zamanaýı tehnologııalaryn engizý jónindegi is-sharalardy kózdeıdi. Budan bólek, turmystyq jaǵdaıda sý únemdeý boıynsha ádistemelik nusqaýlyq ázirlengen.
«Biz tirshilik úshin mańyzdy bul jobany mektep oqýshylarynan bastaýdy jón kórdik. Sebebi, mektep jaqsy ádet pen durys daǵdy úlgisin qalyptastyrýdyń bastamasy. Bul joba oqýshylardyń sý resýrstarynyń mańyzy týraly bilimin arttyrýǵa, jastardyń ekologııalyq jaýapkershiligin damytyp, qala mektepterinde sýdy únemdeý qozǵalysyn qalyptastyrýǵa arnalǵan. Biz aldaǵy ýaqytta bul jobanyń aýqymyn respýblıka kóleminde odan ári damytyp, barlyq jastaǵy azamattardy qamtýdy josparlap otyrmyz», dedi Sý resýrstary jáne ırrıgasııa mınıstri Nurjan Nurjigitov.
Shara barysynda oqýshylar taqyryp tóńireginde oıymen bólisip, sýdy únemdeýge qatysty tyń ıdeıalaryn ortaǵa saldy.
