Foto: aikyn.kz
Depýtattyq saýalda Atyraý oblysynyń Isataı aýdanynda ornalasqan Baqsaı, Naryn jáne Sbornyı sýarý arnalarynyń tehnıkalyq jaǵdaıyn jaqsartý arqyly sýarmaly eginshilikti damytý týraly aıtyldy.
Búginde oblystaǵy 3,2 mıllıon gektardan astam aýyl sharýashylyǵy jeriniń 5 321 gektary ǵana sýarmaly jerler. Bul jalpy áleýettiń 33 paıyzynan tómen.
«Negizgi sebep — sý sharýashylyǵy ınfraqurylymynyń tozýy, sý arnalaryndaǵy ótkizgishtik qabilettiń tómendeýi, mehanıkalyq tazartý jumystarynyń júıeli túrde júrgizilmeýi, avtomattandyrý deńgeıiniń tómendigi jáne bilikti kadrlardyń jetispeýshiligi. Bul máseleler sýdyń maqsatty tutynýshyǵa jetpeı, ysyrap bolýyna ákelip soqtyrýda. Atap aıtqanda, atalǵan sý arnalary tereńdetý, túbin tazartý, jaǵalaýlaryn nyǵaıtý, sý rettegish qurylǵylaryn jańartý jáne kúrdeli jóndeý jumystaryn qajet etedi, laı, baldyr, qamys pen basqa bógetterdiń jınalýy nátıjesinde sý aınalymy buzylyp, aýyl sharýashylyǵy jerlerin sýmen qamtý múmkindigi shektelip otyr. Bul jaǵdaı Aqqystaý, Janbaı, Zıneden jáne basqa da aýyldardaǵy eginshilik pen mal sharýashylyǵynyń damýyna keri áserin tıgizip jatyr», dep atap ótti «Aýyl» partııasynyń Agrarlyq máseleler jónindegi komıtet múshesi J. Daırabaev.
Atalǵan sý arnalary- osy óńirlerdiń áleýmettik-ekonomıkalyq ómiriniń ózegi. Sondyqtan depýtattar Sý resýrstary jáne ırrıgasııa mınıstrligine myna máselelerdi sheshýdi usyndy:
«Sýarmaly arnalardy qalpyna keltirý boıynsha keshendi tehnıkalyq-ekonomıkalyq negizdeme daıyndaý; Memlekettik-jekemenshik áriptestik tetikterin qoldana otyryp, sý únemdeý tehnologııalaryn (tamshylatyp jáne jańbyrlatyp sýarý) engizý; Qosymsha sý jınaqtaýshy qoımalardy salý jáne sý tasqyny kezinde sýdy tıimdi paıdalaný júıesin qurý; Sý arnalarynyń boıyndaǵy ınjenerlik ınfraqurylymdy sıfrlandyrý jáne avtomattandyrý; Sý sharýashylyǵy salasyndaǵy kadrlyq áleýetti arttyrý jáne mamandar daıarlaý júıesin jetildirý», dedi J. Daırabaev.
Komıtet músheleri óńirdegi Isataı aýdanyna qarasty shalǵaı jatqan Qyzyl úı jáne Jasqaırat eldi mekenderi turǵyndarynyń osy aýyldarǵa baratyn joldyń jaǵdaıyna jáne halyqqa ýaqytyly medısınalyq jedel járdem kórsetýge qatysty kóterip jatqan máselelerge oblys ákimi Serik Shápkenovtiń nazar aýdarýyn surady.
«Isataı aýdanynan Qyzyl úı jáne Jasqaırat aýyldaryna baratyn aýylaralyq avtomobıl joldaryn salýdy qolǵa alý. Qyzyl úı jáne Jasqaırat aýyldary turǵyndaryna medısınalyq kómek kórsetý úshin arnaıy jedel járdem kóligimen qamtamasyz etý. Osy, atalǵan sharalar aýyl sharýashylyǵy óndirisin damytýǵa, jańa jumys oryndaryn ashýǵa, sý resýrstaryn tıimdi paıdalanýǵa jáne aýyl turǵyndarynyń turmys sapasyn jaqsartýǵa septigin tıgizetini sózsiz», dedi depýtat.
