Palata depýtattary «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańdy eki oqylymda qarady. Atalǵan zań sporttyń basym túrlerin aıqyndaýǵa, olardy qarjylandyrýǵa baǵyttalǵan. Sondaı-aq qujat normalary deneshynyqtyrý jáne sport salasyn retteýdiń normatıvtik negizin tujyrymdamalyq turǵydan ózektendirýge múmkindik beredi jáne ulttyq zańnamany, onyń quqyq qoldaný praktıkasyn odan ári jetildirýge yqpal etedi.
– Keıingi jyldarda elimizde sport salasyn damytýǵa basa mán berilip keledi. Prezıdent Qasym-Jomart Toqaev Ulttyq quryltaıdyń
IV otyrysynda sportty damytý máselesine erekshe kóńil bóldi. Osy qaralǵan zań – sport salasyn basqarýdy jetildirý baǵytynda iske asyrylyp jatqan mańyzdy qadamdardyń biri. Zańda sport salasyna bólinetin bıýdjet qarajatyn tıimdi paıdalanýdy qamtamasyz etetin erejeler qamtyldy, – dedi M.Áshimbaev.
Senat tóraǵasynyń aıtýynsha, osylaısha ulttyq sport túrleri basym sport túrleriniń qataryna qosyldy. Sportshylar men bapkerlerge memlekettik áleýmettik qoldaý kórsetý tártibin jetildirýge arnalǵan jekelegen túzetýler de engizilgen. Maquldanǵan zań salamatty ómir saltyn nasıhattaýǵa, azamattardy, ásirese balalardy sportqa baýlýǵa jáne joǵary sporttyq jetistikterge qol jetkizýge múmkindik beredi.
Atalǵan qujatta ulttyq sporttyq medısına jáne ońaltý uıymynyń qyzmetin zańnyń jeke babynda reglamentteý kózdelgen. О́zgerister respýblıkalyq jáne óńirlik sport federasııalarynyń mártebesine de áser etedi. Naqty aıtqanda, olar ulttyq sport federasııalary bolyp ózgertiledi.
Sondaı-aq balalar-jasóspirimder sporttyq bilim berý uıymdarynyń jattyqtyrýshy-oqytýshylaryna aptasyna 18 saǵattyq normatıvtik oqý júktemesi engiziledi. Al el azamaty bolyp sanalmaıtyn sportshylardy bıýdjet qarajaty esebinen qarjylandyrýǵa tyıym salynady.
Buǵan qosa birqatar salalyq zańnamalyq aktilerdiń maqsattaryn, mindetteri men qaǵıdattaryn aıqyndaý bóligine ózgerister men tolyqtyrýlar engiziledi.
Sonymen qatar palata otyrysynda senator Andreı Lýkın depýtattyq saýal joldady. Ol jerdi paıdalanýdaǵy memlekettik baqylaý salasynda anyqtalǵan eleýli zań buzý derekteri týraly aıtty. Senatordyń pikirinshe, bul tásil kásipkerlerge qaýip tóndirip, bılikke degen senimge nuqsan keltiredi.
– Júıeli qatelikter men jekelegen laýazymdy tulǵalardyń áreketsizdigi kásipkerlik ahýalǵa eleýli zııan keltiredi. Bolashaqta zań buzý derekteriniń qaıtalanýyn boldyrmaýǵa atsalysý kerek jáne júıeli sharalar qabyldanýǵa tıis. Jer resýrstaryn memlekettik baqylaý zań sheńberinde kásipkerlerge artyq qysym jasamaı júzege asýy qajet, – dedi A.Lýkın.
Máselen, Soltústik Qazaqstan oblysyndaǵy «Bidai-Astyk» JShS-na basshylyqqa habarlanbaı tekserý júrgizilip, aqyr sońynda ol uıǵarym zańsyz dep tanylǵan. Al Shyǵys Qazaqstan oblysynda «Georgıevskoe» JShS-nyń jer ýchaskelerin ıgerý qajettigi týraly uıǵarymy talaptardy oryndamaı alynyp tastalǵan.
– Qalyptasqan jaǵdaıdy túzetý jáne bolashaqta osyndaı zań talabyn buzǵandardy aldyn alý úshin birqatar shuǵyl shara qabyldaýdy usynamyn. Atap aıtqanda, tekserýlerdiń zańdylyǵyn qamtamasyz etý, negizsiz tekserýler men uıǵarymdar tájirıbesin toqtatý, sot sheshimderiniń oryndalýyna baqylaýdy kúsheıtý kerek. Sondaı-aq zań buzýshylyqqa qatysy bar laýazymdy tulǵalardy atqaratyn laýazymynan bosatýǵa deıin tártiptik jaýapkershilikke tartý týraly máseleni qaraý qajet. Ashyq baqylaý tetikteri engizilsin, – dedi senator.
