Foto: Aqorda
О́zara alys-beristiń kólemin arttyrý úshin prezıdentter quzyrly organdarǵa naqty sharalar qabyldaý týraly tapsyrma berdi. Sondaı-aq Qasym-Jomart Toqaev Qazaqstannyń sý resýrstaryn basqarý isinde sloven tarapynyń ozyq tájirıbesin zerdelep, birlese jumys isteýge daıyn ekenin jetkizdi.
Budan bólek, taraptar mádenı-gýmanıtarlyq yqpaldastyq jaıynda da pikir almasty.
«Bilim, ǵylym jáne mádenıet salalaryndaǵy qarym-qatynasty jandandyrýǵa mol múmkindik bar. Jalpy Slovenııanyń bilim berý júıesi dúnıe júzinde ozyq júıe retinde moıyndalǵan. Sondyqtan biz eki el ýnıversıtetteri arasynda baılanys ornatýǵa múddelimiz. Slovenııanyń Iojef Stefan ınstıtýty Nazarbaev ýnıversıtetimen baılanys ornatýǵa qyzyǵýshylyq tanytyp otyr. Qazaqstan Slovenııanyń joǵary oqý oryndarymen jáne zertteý ortalyqtarymen yntymaqtastyqty nyǵaıtýǵa daıyn», dedi Memleket basshysy.
Taraptar halyqaralyq jáne aımaqtyq ózekti máselelerdi talqylap, ustanymdarynyń ortaq ekenin jetkizdi.
«Qazirgi geosaıası jaǵdaı óte kúrdeli. Prezıdent Pırs-Mýsar ekeýimiz álemdegi qaqtyǵystardy Birikken Ulttar Uıymy Jarǵysy men halyqaralyq quqyq qaǵıdattaryna saı beıbit jolmen sheshý qajet ekenin quptadyq. Kópjaqty qurylymdar aıasyndaǵy yqpaldastyqty odan ári kúsheıtýge múddeli ekenimizdi rastadyq. Almatyda Ortalyq Azııa men Aýǵanstan úshin Ornyqty damý maqsattary jónindegi Birikken Ulttar Uıymynyń aımaqtyq ortalyǵyn ashý týraly bastamany qoldaǵan Slovenııa tarapyna rızashylyǵymdy bildiremin. Jalpy búgingi kelissózder jemisti boldy dep kúmánsiz aıtýǵa bolady. Osy sapardyń nátıjesinde qazaq-sloven yqpaldastyǵy nyǵaıyp, jańa deńgeıge kóteriledi dep senemin. Birlesken kúsh-jigerimizdiń arqasynda biz ortaq maqsattarǵa qol jetkizemiz», dedi Qasym-Jomart Toqaev.
Natasha Pırs-Mýsar Slovenııa tarapynyń barlyq baǵyt boıynsha ekijaqty yntymaqtastyqty nyǵaıtýǵa daıyn ekenin málimdedi.
«Búgingi kezdesýler, jalpy bul sapar Slovenııa men Qazaqstan arasyndaǵy qarym-qatynastyń jańa paraǵyn ashady dep oılaımyn. Eki el de ózara túsinistik pen qurmetke negizdelgen halyqaralyq quqyq, ornyqty damý men seriktestik qaǵıdattaryn qoldaıdy. Men buǵan rızamyn. Keleshekte de osy baǵytta jumys isteı beretinimizge senimdimin», dedi Slovenııa Prezıdenti.
