Foto: Evgenıı Epanchınsev
Konferensııa jumysyna QR Prezıdenti Ákimshiliginiń Ishki saıasat bóliminiń meńgerýshisi Abzal Núkenov, QR Mádenıet jáne aqparat mınıstri Aıda Balaeva, Reseı Federasııasy Prezıdentiniń shet eldermen aımaqaralyq jáne mádenı baılanystar jónindegi basqarmasy basshysynyń orynbasary Anton Rybakov, Reseı Federasııasynyń Jastar isi jónindegi federaldyq agenttigi basshysy Grıgorıı Gýrov, eki eldiń ǵalymdary men sarapshylary, sondaı-aq belsendi jastar qatysty.
QR Mádenıet jáne aqparat mınıstri Aıda Balaeva óz sózinde qazaqstandyqtardyń Jeńiske qosqan úlesine toqtalyp, soǵysqa ár besinshi respýblıka turǵynynyń attanǵanyn atap ótti. Soǵys jyldarynda 601 011 adam qaıtys boldy, 271 503 otandasymyzdyń taǵdyrynan áli kúnge deıin beıhabarmyz.
Mınıstr sonymen qatar soǵys jyldarynda Qazaqstan qýatty qorǵanǵa aınalǵanyn aıtty.
«Soǵys – bul tek adam shyǵyny ǵana emes, sonymen qatar ekonomıkalyq ta shyǵyn. Týra maǵynasynda aıtqanda, Qazaqstan maıdanǵa bárin berdi. Soǵys jyldarynda respýblıka maıdanǵa qorǵasynnyń 85 paıyzyn jetkizdi, al ár tórtinshi oq Lenınogorskide (qazirgi Rıdder) óndirilgen shıkizattan jasaldy», dedi A. Balaeva.
Budan bólek, Qazaqstan barlyq polımetall kenderiniń 79 paıyzyn, vısmýttyń 65 paıyzyn, molıbdenniń 60 paıyzyn, mystyń 35 paıyzyn óndirdi.
О́nerkásip oryndaryn jappaı kóshirý Qazaqstandy ındýstrııalyq elge aınaldyrýǵa yqpal etti. Barlyǵy 220 zaýyt evakýasııalanyp, elde mashına jasaý, stanok jasaý, oq-dári óndirisi, hımııa ónerkásibi men qara metallýrgııa syndy jańa ındýstrııalyq salalar qalyptasty.
«Kásiporyndardy kóshirý janarmaı, azyq-túlik, qurylys materıaldary qatty tapshy kezde júrgizildi. Al keıbir zaýyttardyń japan dalada salynǵany – asyra aıtylǵan nárse emes, bul – tarıhı fakt», dedi mınıstr.
